"Qarabağ"ın UEFA Avropa Liqasındakı rəqibi olan İsveçin "Hekken" komandasını tanıyaq.

Prosport.Az-ın hazırladığı xəbərə görə, komanda 14-15 yaşlı yeniyetmə oğlanlar tərəfindən yaradılıb. Onların məqsədi milli futbol liqasında yarışacaq klub yaratmaq olub.

Bu səbəbdən həmin oğlanlar təmsil etdikləri şəhər olan Yöteborqun Futbol Assosiasiyasına müraciət ediblər. Komandanın əvvəl adı "Kik" (qol vurmaq mənasında – red.) olub. Ancaq sonradan bu ad digərləri tərəfindən götürüldüyündən, ad dəyişikliyi lazım gəlib. Bu oğlanların məşq etdikləri sahənin yanında iri yaşıllıq çəpərlər olduğundan və bu, İsveç dilində "Hekken" (Häcken) adlandığından, komanda belə adlandırılmağa başlayıb. "Hekken"in yaranma tarixi kimi 2 avqust 1940-cı il götürülür. Göründüyü kimi, klubun yaranması II Dünya Müharibəsinin qızğın anlarına təsadüf edib.

1943-cü ildən regional çempionatlara qoşulan "Hekken" İsveçin ən peşəkar elit yarışı olan Allsvenskana yalnız təxminən 40 il sonra – 1982-ci ildə vəsiqə qazana bilib. Yöteborq təmsilçisi ötən il ilk dəfə İsveç çempionu olub, 3 dəfə (2015/16, 2018/19, 2022/23) isə İsveç Kubokunu qazanıb.

"Hekken"in 2007-ci ildən avrokubok təcrübəsi olsa da, ilk dəfə qrup mərhələsində çıxış edəcəklər. Komanda bu mövsüm avrokuboklarda yoluna son İsveç çempionu kimi UEFA Çempionlar Liqasında başlayıb. "Ze Nyu Seynts"i (Uels) turnirdən asanlıqla kənarlaşdırsa da, gözlənilmədən Farer adaları çempionu Kİ-yə penaltilərlə uduzub. Avropa Liqasında isə "Hekken" "Jalqiris" (Litva) və "Aberdin" (Şotlandiya) səddlərini aşaraq qrupa vəsiqə qazanıb.

Ləqəbi "arılar" olan komanda ev oyunlarını süni örtüklü 6300 tutuma malik "Bravida Arena"da keçirir. Komandanı 2021-ci ildən norveçli məşqçi Per-Matias Höqmo çalışdırır. Bu baş məşqçi Norveç millisinin sükanı arxasında seçmə mərhələlərdə millimizə rəqib olub. "Hekken"də Nigeriya, Norveç, Tunis, İslandiya, Bosniya və Herseqovina, Danimarka, Serbiya, Yamayka, Fil Dişi Sahili, Şimali Makedoniya və Zambiyadan legionerlər çıxış edir. Millimizin seçmə mərhələdəki rəqiblərindən olan İsveç yığmasının yarımmüdafiəçisi Samuel Qustafson da burada oynayır.

Xatırladaq ki, "Qarabağ" üçün İsveçin Yöteborq şəhərinə səfər ilk olmayacaq. Belə ki, komanda 2016-cı ildə məhz "Hekken"in əzəli rəqiblərindən 1-cisi olan "Yöteborq"u Avropa Liqasının pley-offunda mübarizədən kənarlaşdıraraq (3:0, 1:0) qrupa düşmüşdü.

Qeyd edək ki, "Qarabağ"ın H qrupundakı digər rəqibləri komandanın ən son transferi rusiyalı qapıçı Andrey Lunyovun gəldiyi "Bayer" (Almaniya) və 2020-ci ildə Çempionlar Liqasının III təsnifat mərhələsində penaltilərlə uduzduğu "Molde"dir (Norveç).

Hazırladı: Səbuhi Musa