"Qarabağ"ın futbolçusu Abdellah Zubir Avropa Liqası pley-off mərhələsinin "Olimpiya" ilə matçından (1:1) sonra jurnalistlərin suallarını cavablandırıb.

Prosport.Az 32 yaşlı Mərakeş əsilli fransalı vingerin müsahibəsini diqqətinizə çatdırır:

– Çətin oyun oldu. Onlar daha çox hücumameyilli oynayırdı. Amma biz buna hazır idik. Bu gün biz meydanda vuruşduq, əsl xarakter göstərdik. Məqsədimiz Avropa Liqasının qrupuna düşmək idi. Hədəfimizə çatdıq.

– Çox rahat oynayırdınız. Bu, ilk matçdakı nəticəyə görə idi?
– Yox. Həmişə oyun istədiyin kimi alınmır. Rəqiblər bizi təhlil edirlər, üstün və zəif cəhətlərimizi bilirlər. Əsas olan hədəfimiz idi. Bunu da bacardıq.

– Sabah (bu gün – red.) püşk atılacaq. İstəyərdiniz ki, yenidən "Rakuv"la qarşılaşasınız?
– Həmişə böyük, adlı-sanlı komandalara qarşı oynamaq istəyirəm. Elə rəqiblərlə oynamaq bizim üçün yaxşı təcrübədir. Əgər "Rakuv"la eyni qrupa düşsək, qələbə qazanmağa çalışacağıq.

– 2 oyundur ki, kapitanlıq bazübəndini taxırsınız. Hansı hissləri keçirirsiniz?
– Baş məşqçi kapitanlığı mənə etibar edəndə çox sevindim. Amma əsasən buna fokuslanmıram. Yenə meydanda bacardığımın ən yaxşısını etməyə çalışıram. Eyni zamanda da "Qarabağ"ın kapitanı olmaq böyük şərəfdir.

– Bir qol da vursanız, Azərbaycan futbolu tarixində avrokuboklarda ən çox qol vuran oyunçu olacaqsınız. Bunu bilirdiniz?
– Xeyr, bilmirdim. Xatırlatdığınıza görə sağ olun. Reynaldonun burada etdiklərindən xəbərim var. Həqiqətən möhtəşəm karyerası olub. Onun uğurunu təkrarlasam, çox sevinərəm.

– Həmin qolu nə vaxt vuracaqsınız?
– Ümid edirəm ki, qrup mərhələsində vuraram.

– 6 il əvvəl "Qarabağ" Çempionlar Liqasının qrupuna düşərkən klubun təklifini qəbul etməmişdiniz. Siz gələndən sonra isə komanda ÇL qrupunda iştirak etməyib. Həmin vaxt gəlmədiyiniz üçün təəssüflənirsiniz?
– Əslində həmin təklifdən bir neçə ay sonra komandanın Çempionlar Liqasının qrup oyunlarını izləyəndə içimdən təəssüf hissi keçdi. Təbii ki, bütün futbolçular ən nüfuzlu klub turnirində iştirak etməyi arzulayır. Həmçinin mən də. Amma dünyanın sonu deyil. Ümid edirəm ki, gələcəkdə bu imkanı əldə edəcəyik.

– Uzun illərdir "Qarabağ"dasınız. Komanda sanki bu il baxımlı futbol oynamır, nəticəyə oynayır. Bu fikirlə razısınız?
– İndi əksər komandalar nəticəyə oynayır. Yaxşı oynayıb uduzsaq, dəyəcəksiniz ki, niyə məğlub oldunuz. Baxımlı oyun zamanla gələcək. Əsas nəticə qazanmaqdır.