"Qarabağ" UEFA Avropa Liqasında qrup mərhələsinə vəsiqə qazanıb.

Prosport.Az xəbər verir ki, Qurban Qurbanovun baş məşqçisi olduğu komanda pley-offun cavab oyununda Sloveniya "Olimpiya"sını qəbul edib.

Tofiq Bəhramov adına Respublika stadionunda baş tutan qarşılaşma 1:1 hesabı ilə başa çatıb.

Azərbaycan təmsilçisinin heyətində Toral Bayramov 24-cü dəqiqədə penaltidən fərqlənərək hesabı açıb. Qonaqlardan isə portuqaliyalı Dioqu Pintu 36-cı dəqiqədə tarazlığı bərpa edib.

Səfərdəki görüşdə rəqibini 2 cavabsız qolla üstələdiyi üçün "köhlən atlar" Avropa Liqasında qrup mərhələsinə yüksəlib. Bununla da "Qarabağ" 10-cu dəfə qrup mərhələsinə vəsiqə qazanıb.

Qeyd edək ki, ölkə çempionunun qrupdakı rəqibləri sabah bəlli olacaq.