"İnanmıram ki, əvvəlki oyunun nəticəsinə görə "Qarabağ"da arxayınlaşma olsun. Komanda ilk oyunda 0:0 olmuş kimi meydanda çıxacaq. Ola bilər ki, hər 2 komanda ilk dəqiqələrdə bir az ehtiyatlı oyuna üstünlük versin. Heç bir komanda 1 qol buraxıb, pis vəziyyətə düşmək istəməz. Ancaq sonrakı dəqiqələrdə hər 2 komanda irəliyə atılacaq. Gözləntim odur ki, "Qarabağ" məhz sonrakı dəqiqələrdə vurduğu qol və ya qollarla qalib gələcək. Amma konkret hesab proqnozu verə bilmərəm".

Bunu Prosport.Az saytına "Qarabağ"ın sabiq futbolçusu Rauf Əliyev bildirib.

2006-2013-cü illərdə bu klubda çıxış etmiş 34 yaşlı veteran Sloveniya çempionunun bu gün keçiriləcək UEFA Avropa Liqasının pley-off mərhələsinin cavab matçında "Qarabağ"a sürpriz edə biləcəyini də istisna etməyib: "Ola bilsin ki, bu dəfə "Olimpiya" daha çox hücumameyilli oynasın. Çünki onlara qələbə lazımdır. Oyunun əvvəlində "Qarabağ"a sürpriz də edə bilərlər. Amma "Qarabağ" 1 həftə əvvəl Lyublyanada oynadığı kimi oynasa, onda "Olimpiya"nın heç bir şansı olmayacaq".

Hazırda "Qarabağ"ın 19 yaşadək komandasında məşqçi işləyən Rauf Əliyev bu matçda Qurban Qurbanovun ilk oyundakı hesaba görə rotasiya edəcəyinə inanmadığını bildirib: "5-6 il Qurban Qurbanovun rəhbərliyi altında oynamışam. İnanmıram ki, ilk oyundakı hesabı nəzərə alıb, bu matçda rotasiya etsin. Ola blər ki, hansısa oyunçunun zədəs olar, onda dəyişiklik qaçılmazdır. Ancaq Qurban müəllimin rotasiya edib, risk edəcəyinə heç inanmıram".

Qeyd edək ki, "Qarabağ" – "Olimpiya" oyunu bu gün saat 20:00-da başlayacaq.