Azərbaycan millisinin kapitanı Amil Həmzəyev İsveç Basketbol Federasiyasının baş katibi Peter Ökvist və Norveç Basketbol Federasiyasının baş katibi Aksel Lanqayerlə görüşüb.
Görüşdən sonra o, keçirdiyi görüşlərlə bağlı Prosport.Az-a açıqlama verib.
O bildirib ki, bu görüşlərdə təşəbbüs özündən gəlib və qarşı tərəf bunu müsbət qarşılayıb. Həmzəyev görüşdən sonra Norveçdə basketbol səviyyələrinin Azərbaycanla eyni olmasının səbəbini öyrənməsindən danışıb:
“Özüm Skandinaviyaya səyahət etməyi planlaşdırmışdım. Bura gəlməzdən əvvəl federasiyalarla əlaqə saxlamışdım ki, görüşək. İsveç və Norveç federasiyalarından görüş üçün razılıq almışdım. Bura gələndə də vaxtımı həmin görüşlərə uyğunlaşdırdım və şəxsi təşəbbüsümlə gedib görüşdüm.
Mənə maraqlı gəlirdi ki, həmişə buradakı insanların basketbola yanaşması necədir. Məsələn, biz özümüz haqqında düşünəndə görürük ki, fiziki quruluşumuz, boyumuz, fiziki göstəricilərimiz o qədər də basketbola uyğun deyil. Ancaq biz buna görə fərqli basketbol üslubu seçirik. Daha sürətli, fərdi mübarizəyə və təkbətək oyuna daha çox üstünlük verilən basketbol oynayırıq.
Boy məsələsində, məsələn, əsas milli komandada da çox vaxt uzun mövqelərə xarici oyunçular gətirmişik. İndi aşağı yaş qruplarında da nigeriyalı Manu “5 nömrə” mövqeyində oynayır. Bu mövqeyə oyunçu yetişdirmək çətin olur. Haradasa “4 nömrə”yə qədər oyunçular yetişdirə bilirik. Ancaq tam “5 nömrə” mövqeyində oynaya biləcək oyunçular bizdə tarix boyu çox nadir hallarda olub.
Onlarda isə əksinədir. Fiziki göstəriciləri buna imkan verir, hündürdürlər, necə deyim, vikinqlərdir. Amma buna baxmayaraq, Norveçin basketbol millisi bizim komandamızla demək olar ki, eyni səviyyədədir. Onlar da bizim kimi ilkin təsnifat mərhələsində oynayır. İsveç, düzdür, bizdən daha yaxşı səviyyədədir. İsveçin əvvəllər MBA-da oynayan oyunçusu olub, hazırda da var.
Amma burada məsələ nədir? Bunların verdikləri maaş, liqadakı səviyyə və ümumi vəziyyət fərqlidir. Məsələn, onlar xarici oyunçulara çox üstünlük vermir. Xaricdən oyunçu gətirib ona çox pul verməyi və sonra həmin oyunçunun çıxıb getməsini yerli basketbol üçün faydalı hesab etmirlər.
Onlar yerli uşaqları müəyyən yaşa qədər yetişdirir. Ondan sonra çox yaxşı seçilənlər ABŞ-də kollec və universitet komandalarında çıxış edir. Digərləri isə ölkə liqasında oynayırlar. Ölkə liqasında oynayanlara verilən maaş isə ümumi orta maaşdan çox da yüksək deyil.
Bizdə bu bir qədər fərqlidir. Ümumi düşüncə də fərqlidir. Təkcə basketboldan danışmıram, idmanda belədir. Məsələn, Braziliyada məşhur futbolçu olub həyatı qurtarmağa necə baxırlarsa, bizdə də güləşdə, cüdoda olimpiya, Avropa və ya dünya çempionu olmağa həyatını qurtarmaq kimi baxırlar. Yəni bunu bir çıxış yolu kimi görürlər.
Ancaq burada elə deyil. Burada, məsələn, sən milli komandanın oyunçususansa, şərti deyirəm, 6-7 manat alırsan. Yaxud hansısa bir firmada işləyirsən və 5, hətta bəzən 6 manat maaş alırsan. Ona görə də bu, çox şey dəyişmir. Həyat səviyyəsinin yüksək olması insanları idmana yönəltmir.
Onlar müəyyən yaşa qədər uşaqları sağlamlıq baxımından, pis vərdişlərdən uzaqlaşdırmaq baxımından idmanda saxlayırlar. Amma eyni zamanda təhsilə də çox böyük önəm verirlər. Təhsilləri çox yüksək səviyyədədir və heç vaxt təhsili 2-ci plana keçirməkdən söhbət getmir. Əksinə, idman təhsilə uyğunlaşdırılır.
Heç vaxt təhsildən geri qalmırlar. Bunun nəticəsində də sabah basketbolda davam edə bilməyəndə, istəməyəndə, zədələnəndə və ya başqa hallar baş verəndə, asanlıqla öz sevdikləri sahəni seçib orada işləyə bilirlər. Bunda da uğurlu olurlar”.
36 yaşlı Amil Həmzəyev daha sonra karyerası haqda məlumat verib. "Neftçi"dən ayrılan oyunçu karyerasını yeni mövsümdə "Naxçıvan" klubunda keçirəcəyini və milli komandada çıxışını davam etdirəcəyini bildirib.
