Millimizin hücumçusu Musa Qurbanlı İsveç çempionatında ilk qollarını vurub.

Prosport.Az xəbər verir ki, bu, XXI turun "Yurqorden" – "Deqerfoş" oyununa təsadüf edib. Qurbanlının formasını geyindiyi "Yurqorden" doğma meydanda rəqibini 4:1 hesabı ilə məğlub edib. 

21 yaşlı hücumçu komandasının vurduğu 4 qoldan 3-də yaxından iştirak edib. Musa əvvəlcə 2-ci dəqiqədə norveçli Qustav Vikheymə məhsuldar ötürmə verib.

Daha sonra 23-cü və 34-cü dəqiqələrdə bosniyalı Haris Radetinatsın ötürmələrini Musa qola çevirib. Düzdür, 58-ci dəqiqədə futbolçumuz het-trik etməyə də yaxın olub. Lakin o, penaltidən fərqlənməyi bacarmayıb, rəqib qapıçı onun zərbəsinin istiqamətini müəyyənləşdirə bilib. 89-cu dəqiqədə Qurbanlı müdafiəçi Teo Berqvalla əvəzlənib. Bununla belə, 2 qol + 1 assistə imza atmış Musa 8,4 xalla oyunun ən yaxşı futbolçusu seçilib.

Qeyd edək ki, daha əvvəl o, İsveç Kubokunda qol hesabını açıb. Avqustun 23-də "Yurqorden"in "Sandviken"ə səfərdə 5:1 qalib gəldiyi oyunda Musa Qurbanlı 12-ci dəqiqədə komandasının 2-ci qolunun müəllifi olub.