Avqustun 24-dən 27-dək Qubada 2015-ci il təvəllüdlü futbolçular arasında III “Ulduz Cup” beynəlxalq futbol turniri keçiriləcək.

Prosport.Az xəbər verir ki, turnir Gənclər və İdman Nazirliyi, AFFA və “Ulduz” Futbol Akademiyasının təşkilatçılığı ilə baş tutacaq.

Quba Olimpiya İdman Kompleksinin stadionunda təşkil olunacaq turnirdə Azərbaycanı “Ulduz”, “Zirə”  “Sabah”, “Neftçi” və “Qarabağ”, Özbəkistanı “Paxtakor” və “Bunyodkor”, Gürcüstanı “Dinamo Tbilisi”, Polşanı “Drukarz”, Türkmənistanı “Altın Taç”, Qırğızıstanı “Sduşorsi”, Qazaxıstanı “Kayrat” komandaları təmsil edəcək. Beləliklə, yarışda ümumilikdə 7 ölkədən 12 komanda mübarizə aparacaq.

Qeyd edək ki, “Ulduz Cup” beynəlxalq futbol turniri artıq 3-cü dəfə keçirilir. İlk turnirdə “Dinamo Minsk” (Belarus) qalib olub. “Ulduz” FA (Azərbaycan) 2-ci, “Bunyodkor” (Özbəkistan) isə 3-cü yeri tutublar. Ötən il keçirilən II “Ulduz Cup” turnirində isə “Neftçi” (Azərbaycan) çempion, “Paxtakor” (Özbəkistan) 2-ci, “Dinamo Tbilisi” (Gürcüstan) 3-cü olublar.