Niderlandın “Tvente” klubu UEFA Konfrans Liqasının pley-off mərhələsində “Qarabağ”la keçirəcəyi ilk oyun öncəsi 2 futbolçusunun xidmətindən məhrum olub.

Prosport.Az xəbər verir ki, komandanın baş məşqçisi Con van den Brom mətbuat konfransında heyətdəki son durum barədə məlumat verib.

23 yaşlı mərkəz müdafiəçisi Stav Lemkin zədə səbəbindən “Qarabağ”la qarşılaşmada iştirak etməyəcək. Futbolçu artıq 2 həftədir zədə səbəbindən komandasından ayrı qalır.

“Qarabağ”la ev oyununda “Tvente”nin digər müdafiəçisi Mees Hilqers də meydançaya çıxa bilməyəcək. O, hələ reabilitasiya prosesini davam etdirir.

Maks Brüns isə fiziki problemlərini geridə qoyaraq məşqlərə qayıdıb və artıq komandanın sərəncamındadır. Lakin onun “Qarabağ”a qarşı start heyətində meydana çıxıb-çıxmayacağı hələ məlum deyil.

Van den Bromun sözlərinə görə, “Tvente”nin qalan futbolçuları qarşılaşmaya tam hazırdır. Ruud Neystadın start heyətində yer alması gözlənilir. Müdafiənin mərkəzində onun tərəfdaşının Brüns və ya Robin Pröpper olacağı ehtimal edilir.

Qeyd edək ki, avqustun 20-də keçiriləcək “Tvente” – “Qarabağ” qarşılaşması Bakı vaxtı ilə saat 22:00-da başlanacaq. Cavab görüşü isə avqustun 27-də Tofiq Bəhramov adına Respublika stadionunda təşkil olunacaq. İki oyunun nəticəsinə əsasən qalib gələn komanda turnirin əsas mərhələsinə vəsiqə qazanacaq.