"Neftçi"nin heyətinə cəlb etmək istədiyi Sebastyan Maylatın transferi baş tutmayıb.

Prosport.Az xəbər verir ki, "ağ-qaralar" 28 yaşlı futbolçu ilə bağlı Rumıniyanın "Botoşani" klubu ilə razılığa gəlsə də, sonradan vəziyyət dəyişib. Bu barədə digisport.ro saytı məlumat yayıb.

Bakı təmsilçisinin sol cinah vingerinə görə 400 min avro ödəməyə hazır olduğu bildirilirdi. Lakin "Botoşani"nin prezidenti Valeriu İftime oyunçunun "Neftçi"yə keçməyəcəyini açıqlayıb:

"Azərbaycandan olan təklif bağlandı. Yaxşı təklif idi, bildiyimə görə, məsələ bir neçə istiqamətdə müzakirə olunub. Düşünürəm ki, onlar artıq başqa futbolçuya üstünlük veriblər. Maylatın digər təklifi də var idi, amma o, "Botoşani"də qalmaq və rahat olmaq istədiyini bildirdi. Sebastyan bizimlə yeni müqavilə imzalamaq niyyətindədir".

Xatırladaq ki, Maylat Rumıniya çempionatının son turunun FKSB ilə matçından sonra jurnalistlərə açıqlamasında "Botoşani" və "Neftçi"nin razılığa gəldiyini, yalnız bəzi detalların qaldığını demişdi.

Futbolçu bu mövsüm "Botoşani"nin heyətində Rumıniya Superliqasında 5 oyunda 1 qol və 1 məhsuldar ötürmə ilə yadda qalıb. O, ötən mövsüm komandanın heyətində 40 oyunda 15 qol vurub və 5 assist edib. "Transfermarkt" portalı vingerin dəyərini 1 milyon avro olaraq qiymətləndirir.