Azərbaycan millisinin futbolçusu Ozan Can Kökçü Türkiyədə Peşəkar Futbol İntizam Komitəsinə (PFDK) göndərilib.

Prosport.Az xəbər verir ki, I Liqa təmsilçisi “Vanspor”da çıxış edən yarımmüdafiəçi avqustun 15-də “Manisa” ilə səfər matçında qayda pozuntusuna yol verib.

Kökçü qarşılaşmanın 69-cu dəqiqəsində komandasının yeganə qolunu vurub. O, 82-ci dəqiqədə rəqib futbolçuya kəllə atdığı üçün birbaşa qırmızı vərəqə ilə meydandan qovulub.

Bundan sonra Kökçü açıqlama verərək davranışının peşəkar futbolçuya yaraşmadığını etiraf edib və “Vanspor” camiasından, məşqçilərdən, komanda yoldaşlarından və azarkeşlərdən üzr istəyib. O, hadisədən əvvəl özünə və ya dəyərlərinə qarşı təhqiramiz ifadələrin səsləndiyini desə də, nəzarəti itirməsinin düzgün olmadığını bildirib.

Qeyd edək ki, “Manisa” – “Vanspor” qarşılaşması meydan sahiblərinin 4:1 hesablı qələbəsi ilə başa çatıb.