Şəhriyar Rəhimovun ailəsinə səbr diləyirəm, Allah rəhmət eləsin. Azərbaycan futbolu üçün ağır itkidir. Oyuna gəldikdə isə bilirdik ki, "Səbail" əks-hücumlara bel bağlayır. İlk dəqiqələrdə qol buraxmaq bütün planlarımızı pozdu. Futbolçular tələsməyə başladı. Rəqibin müdafiəsini yara bilmirdik. Bu gün ən zəif oyunumuzu göstərdik. İnanıram ki, bu, təkrarlanmayacaq. Amma mövsümün əvvəlidir. Bizdə də yeni oyunçular var, uyğunlaşmaq üçün vaxt lazımdır. Komandanın potensialı var".

Prosport.Az-ın məlumatına görə, bunu "Turan Tovuz"un baş məşqçisi Ayxan Abbasov bildirib.

O, "Səbail"lə oyunda heyətin rəqibin gücünə görə qurulduğunu, bu səbəbdən ötən tur Qərb derbisində "Kəpəz"lə qələbədə start heyətdə çıxan və 2-ci qolu vuran Belaydi Pusinin ehtiyatda qalması barədə danışıb: "Heyət rəqibə görə idi. Erkən qol tələskənlik yaratdı. Hücumlarımız oldu, sadəcə sonluq çatmadı. Amma mənim üçün "qalib heyət" anlayışı yoxdur. Kim güclüdürsə, özünü yaxşı hiss edirsə, onu da meydana buraxıram".