“Tvente”nin baş məşqçisi Con van den Brom Niderland çempionatında “Zvolle” ilə oyundan (3:1) sonra komandasının çıxışını və qarşıdakı “Qarabağ” matçlarını şərh edib.

Prosport.Az xəbər verir ki, 59 yaşlı mütəxəssis komandasının oyunundan razı qaldığını bildirib:

“Yenidən “Tvente”nin oyunundan zövq ala bildik. Meydanda komanda kimi idik. Görmək istədiyimiz də budur – təşəbbüs, temp və yüksək intensivlik, rəqibi oyundan salmaq. Bunu etdik. Yaxşı oynayırdıq, amma hesabda geri düşdük və buna reaksiyanın olduğunu hiss edirsən. Futbolçular da buna reaksiya verir, bəlkə də əvvəlkindən bir az daha əsəbiləşirlər. “De Qrolş Veste”də azarkeşlərin bizə necə dəstək olduğunu yüksək qiymətləndirirəm”.

Baş məşqçi “Qarabağ”la qarşıdakı 2 oyunun komanda üçün həlledici əhəmiyyət daşıdığını və azarkeşlərin dəstəyinə inandıqlarını vurğulayıb: “Azarkeşlərin cümə axşamı “Qarabağ”la oyunda da bizi dəstəkləyəcəklərinə inanıram. Qarşıda 2 həlledici görüş var. Qışa qədər Avropada qalacağıq, yoxsa mübarizəni dayandıracağıq? Dəstəyi yenidən görəcəyimizə, demək olar ki, əminəm”.

Xatırladaq ki, “Tvente” ilə “Qarabağ”arasında ilk oyun avqustun 20-də Ensxededə, cavab matçı isə avqustun 27-də Bakıda olacaq.