"O qədər də sevinmirəm. Bu oyun Şəhriyar Rəhimovun ruhu üçün idi. O, komandanın formalaşmasında böyük rol oynayıb, legionerlərin bura gəlməsi üçün bəlkə 300-dən çox oyun izləyib. Ruhu şad olsun, nur içində yatsın. Oyunu Şəhriyar Rəhimova görə oynayırdıq. Bu komandanın qurulmasında onun böyük rolu olub. 8 legionerin gətirilməsində böyük rol oynayıb".

Prosport.Az-ın Tovuza ezam olunmuş əməkdaşının verdiyi məlumata görə, bunu "Səbail"in baş məşqçisi Şahin Diniyev bildirib.

Diniyev rəhmətə getmiş "Səbail"in seleksiyaçı məşqçisi Şəhriyar Rəhimovla bağlı danışarkən kövrəlib: "Türkiyəyə getməmişdən öncəki son görüşümüzdə o mənə bildirdi ki, mən işimi bitirdim. Dedim ki, istirahət et, yanvarda yenidən görüşərik. Qismət olmadı (kövrəlir). Onun gedişi bizə çox təsir etdi. Ölümünü eşidəndə biz artıq Tovuzda idik. Dəfnində iştirak edə bilməsəm də, klub rəsmiləri iştirak etdi. Onun övladları bizimkidir. Burdan qayıdıb yas mərasimində iştirak edəcəyik".

Oyunla bağlı Şahin Diniyev isə bunları bildirib: "Ayxan Abbasov çox döyüşkən komanda yaradıb. Xüsusən sonradan meydana girən futbolçular oyunu dəyişdi. Erkən qol vuracağımızı gözləmirdim".

Qeyd edək ki, "Səbail" "Turan Tovuz"a 3:1 hesabı ilə qalib gəlib.