Ümumdünya Güləş Birliyinin (UWW) Özbəkistanın paytaxtı Daşkənddə 30 aprel – 1 may tarixlərində keçirdiyi qrapplinq üzrə seçmə yarışda Azərbaycanın 2 idmançısı qızıl medal qazanıb.

Prosport.Az xəbər verir ki, bunlar Nadir İmaməliyev (84 kq) və Hacımurad Purtiyevdir (92 kq). Onlar finalda müvafiq olaraq yerli idmançı Uluqbəy Rəhmanova (Özbəkistan) və Eldar Rafiqayevə (Moldova) qalib gələrək çempion olublar.

Bununla da hər 2 idmançımız 21-30 oktyabr tarixlərində Səudiyyə Ərəbistanının paytaxtı Ər-Riyadda keçiriləcək III Ümumdünya Döyüş Oyunlarına vəsiqə qazanıb. Ümumiyyətlə, bu seçmə yarış vasitəsilə 12 kişi və 4 qadın qrapplinq idmançısı həmin yarışda iştirak hüququ əldə edib. Ötən il İspaniyanın Pontevedra şəhərində keçirilmiş dünya çempionatında daha 40 idmançının lisenziya qazandığını da xatırladaq.

Qeyd edək ki, UWW-nin daha bir yarışı – pankration üzrə dünya çempionatı 2-4 may tarixlərində Daşkənddə keçiriləcək.