Azərbaycan Premyer Liqasının IV turunun "Turan Tovuz" - "Səbail" oyununda dünən dünyasını dəyişən millimizin sabiq futbolçusu Şəhriyar Rəhimov yad edilib.

Prosport.Az-ın Tovuza ezam olunmuş əməkdaşının verdiyi məlumata görə, oyundan əvvəl meydan sahibi "Turan Tovuz" klubu tərəfindən hazırlanmış oyun proqramında mərhum haqqında başsağlığı yazısı da əks olunub.

Oyundan öncə isə PFL-in qərarı ilə komandalar 1 dəqiqəlik sükutla onu yad edib. Bakıdan gəlmiş azsaylı "Səbail"in fanklubunun azarkeşləri Ş.Rəhimovun şəkli olan posteri nümayiş etdirib.

5-ci dəqiqədə hesabı açan "Səbail"in Madaqaskar əsilli fransalı hücumçusu Aleksandr Ramalinqom da vurduğu qoldan sonra Şəhriyar Rəhimovun adı yazılmış formanı azarkeşlərə tərəf tutaraq qolunu ona həsr etdiyini göstərib.