Azərbaycan Premyer Liqasının I turunun “Zirə” – “Şəfa” oyunundan (0:2) sonra qonaq komandanın baş məşqçisi Zaur Həşimov mətbuat konfransında iştirak edib.
Prosport.Az xəbər verir ki, mütəxəssis əvvəlcə görüşlə bağlı düşüncələrini bölüşüb.
– Çempionatın debütü baxımından maraqlı qarşılaşma alındı. Düzdür, daha çox mübarizə aparırdıq. Yaxşı komplektləşmiş və uzun müddətdir bir arada hazırlıq keçən rəqibə qarşı oynayırdıq. “Zirə” artıq 6–8 həftədir məşq edir, bizim fiziki durumumuz isə onlardan geridə idi. Kollektivdən narazı qalmadım, məğlubiyyətə rəğmən futbolçularıma təşəkkür etdim. Sıfırdan yığılan komandayıq, ilk məşqimizdə cəmi 12–13 nəfər var idi. Bəzi oyunçular sıramıza yeni qoşulub. Bizə zaman lazımdır və vaxt keçdikcə daha yaxşı səviyyəyə çatacağıq.
– Heyətə həm yerli, həm də əcnəbi futbolçular cəlb olunub. Seleksiya işindən razısınızmı və bu transferlər elitada qalmaq üçün kifayətdirmi?
– Hazırlığa azsaylı heyətlə başladıq. Ötən mövsüm I Liqada çıxış edən futbolçulardan saxladıqlarımız oldu, həmçinin təcrübəli yerlilər, gənclər və legionerlər dəvət etdik. Kollektivi formalaşdıranda hər detalı nəzərə almağa çalışmışıq. Bəzi mövqelər üzrə danışıq aparmağa yerli oyunçu tapmaq mümkün olmadı. Bu səbəbdən həmin mövqelərdə əcnəbilərə üstünlük verdik.
– Rumıniyalı sol cinah müdafiəçisi Andrey Draqunun 11 nömrəli formada çıxış etməsi diqqət çəkdi. Hücumçu tapılmadığı üçün bu nömrə ona verildi, yoxsa öz seçimi idi?
– Nömrələri futbolçular özləri seçib. Biz də kim hansı rəqəmi istədisə, onu təqdim etdik. Burada mövqe fərqi rol oynamır, sırf Draqunun öz istəyi idi.
– Komandanın formaya düşməsi üçün nə qədər vaxta ehtiyac var?
– Zaman məsələsini bəhanə kimi gətirmirəm. Təxminən 1,5 ay öncə formalaşan komandayıq. Meydana nəticə üçün çıxmışdıq, yoxlama görüşlərində də uduzmamışdıq. Bu, ilk məğlubiyyətimiz oldu. Futbolçuların fiziki bərpası və bir-birini anlaması üçün vaxt vacibdir. Müxtəlif ölkələrdən gələn oyunçuların uyğunlaşma dövründə belə çatışmazlıqların olması normaldır. Oyundan-oyuna performansımızı artıracağıq.
– Ötən mövsümün əsas stopperlərindən olan Arsen Ağcabəyov niyə start heyətində yer almamışdı?
– Arsen “Qəbələ” ilə yoxlama matçında zədələndiyi üçün 2 həftə məşqlərdən kənar qaldı. Bərpa prosesini yeni bitirib və dünəndən komandaya qoşulub. Bu səbəbdən onu yalnız 23 nəfərlik iştirak ərizəsinə daxil edə bildik.