Azərbaycan Premyer Liqasının I turunun “Sumqayıt” – “Neftçi” oyunundan (1:3) sonra meydan sahibi komandanın baş məşqçisi Filipı Kəndidu jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Rəqibi qələbə münasibətilə təbrik edirəm. Bizim oyunçular da pis çıxış etmədi. İlk qola qədər rəqibə imkan vermədik. Standart vəziyyətdən sonra fərqləndilər və bu qol bizdə inamsızlıq yaratdı. Rəqib isə daha güvənli oynamağa başladı. Qola reaksiya verməyə çalışsaq da, alınmadı. Fasiləyə qədər fərqi azaltmaq istədik. İkinci hissəyə dəyişikliklə başladıq. Küləkli hava da bir az çətinlik yaratdı. Geridönüş etmək istəsək də, rəqib bizi əks-hücumda yaxaladı və daha bir qol vurdu. 1:3-dən sonra azlıqda qaldıq. Futbolçumuz öz səhvindən qırmızı vərəqə aldı. 11 nəfərlə qalsaydıq, bəlkə daha yaxşı oynayar, geridönüş edə bilərdik.

– Pozitiv birinə bənzəyirsiniz. Sanki komandanız məğlub olmayıb. 
– Pozitiv olmaq lazımdır. Nələr üzərində işlədiyimizi bilirik. Eyni zamanda, komandama, özümə inanıram. Zamanla daha yaxşı olacağıq. Əlbəttə, nəticəyə görə məyusam, amma hələ mövsüm yeni başlayıb.

– Bu gün sərəncamınızda cəmi 17 oyunçu var idi. Heyətin kasad olması oyuna təsir etdi?
– Nələrisə bəhanə etmək üçün bura gəlməmişəm. Mənim üçün futbolçunun fərqi yoxdur. Əlimdəki materialın ən yaxşısından istifadə etməyə çalışıram. Transferlər olacaq, heyətimiz komplektləşəcək. “Neftçi” ilk rəsmi matçına çıxanda biz toplanışa başlayırdıq. Yeni oyunçular bizimlə cəmi 2-3 məşq keçib.

– Bəzi futbolçular barədə internetdə normal material yoxdur. Onların bir qismi neçə aydır oynamır.
– Reallıq nədirsə, onun üzərində işləyirəm. Qarşıdakı oyunumuz da böyük ehtimalla təxirə salınacaq. Buna görə hazırlıq üçün əlavə vaxtımız olacaq.

– Kapitan Səbuhi Abdullazadə bu gün komandanı çətin vəziyyətdə qoydu. Sarğını ondan almağı düşünürsünüz?
– Kaş belə etməzdi. Amma futbolda belə hallar baş verir. O, bizim kapitanlarımızdandır.