Azərbaycan Premyer Liqasının I turunun “Sabah” – “Kəpəz” oyunundan (2:0) sonra meydan sahibi komandanın baş məşqçisi Valdas Dambrauskas mətbuat konfransında iştirak edib.

Prosport.Az xəbər verir ki, litvalı mütəxəssis əvvəlcə görüşlə bağlı düşüncələrini bölüşüb.

– Qazanılan 3 xala görə futbolçularıma təşəkkür edirəm. Oyunçuların fərdi performansından çox danışmaq istəmirəm. Komanda yaxşı oynamasa belə, bu gün əsas olan qələbə idi. Avrokubokda ağır və emosional matçdan çıxmışdıq. Heyətdə çoxlu rotasiyaya əl atdıq, bu səbəbdən meydana çıxanları mühakimə etmək doğru olmaz. Onlar demək olar ki, ilk dəfədir birlikdə oynayırdılar. 1-ci hissədə istədiyimiz futbolu sərgiləyə bilmirdik, tələsik qərarlar verirdik. Fasilədən sonra dəyişikliklər etdik və vəziyyəti düzəltdik. Rəqibə heç bir şans vermədik, müdafiəçilərimiz inamlı təsir bağışladı. Son dəqiqələrdə 2-ci qolu vuraraq qələbəni təmin etdik. İndi isə növbəti sınağa hazırlaşmalıyıq. Önümüzdə “Hapoel”lə çox ağır görüş var.

– Avrokuboklarda mərhələ adlamısınız və mövsüm ərzində 3 fərqli turnirdə mübarizə aparacaqsınız. Mövcud heyət bu sıx qrafik üçün yetərlidirmi?

– 3 cəbhədə yarışmağın çətin olacağını dərk edirik, lakin 50 futbolçu sifariş edib fərqli heyətlər qura bilmərik. Bəzi həftələrdə 3 matça çıxmalı olacağıq. Vəziyyəti anlayırıq və lazımi həll yollarını tapacağıq. Bu gün protokolda 23 nəfər yer almışdı, bəzi oyunçulara istirahət verdik. Keyfiyyətli heyətə sahibik. Məsələn, bu gün 20 yaşlı yerli qapıçıya etimad göstərdik. Əsas məsələ ard-arda transferlər etmək yox, əlimizdəki komandanın potensialını artırmaqdır. Əlbəttə, axtardığımız profildə kimsə qarşımıza çıxarsa, sıralarımıza qata bilərik, lakin Çempionlar Liqasının pley-off mərhələsinə də bu futbolçularla irəliləmişik və nəticələrimiz ortadadır.