Azərbaycan Premyer Liqasının I turunun “Sabah” – “Kəpəz” oyunundan (2:0) sonra qonaq komandanın baş məşqçisi Azər Məmmədov mətbuat konfransında iştirak edib.

Prosport.Az xəbər verir ki, mütəxəssis əvvəlcə görüşlə bağlı düşüncələrini bölüşüb.

– Azərbaycanın ən güclü və tam komplektləşmiş komandasına qarşı oynadıq. Biz isə yeni formalaşan kollektivik. Futbolçular əllərindən gələni etdilər, pis təsir bağışlamadılar. Bu gün heyətlər arasındakı keyfiyyət fərqi aydın görünürdü. Qarşıda uzun marafon var və zamanla daha yaxşı olacağımıza inanıram.

Azər Məmmədov ardınca jurnalistlərin suallarını cavablandırıb.

– Proqrama əsasən, oyun Gəncədə keçirilməli idi, lakin rəqibin avrokubok qrafikinə görə yerlər dəyişdirildi. Matç öz meydanınızda keçirilsəydi, fərqli nəticə ola bilərdimi?

– Yenilənən stadionumuzda, azarkeşlərimiz önündə oynamağı çox istəyirik, lakin “Sabah”ın xahişinə müsbət cavab verdik və meydan dəyişikliyinə razılaşdıq.

– Əvvəllər “Qarabağ”la matçda da oxşar dəyişiklik olmuşdu və böyükhesablı məğlubiyyətdən sonra istefa vermişdiniz. Yenidən belə hal təkrarlansa, nə edəcəksiniz?

– O vaxt belə situasiyalar üçün kifayət qədər təcrübəli deyildim. Bu gün hesab daha böyük olsaydı, istefa verməzdim.

– Komandaları qarşıda çətin təqvim gözləyir. "Kəpəz"in hazırkı durumu haqqında nə düşünürsünüz?

– Sadəcə vaxta ehtiyacımız var. Tam toparlanmaq və futbolçuların adaptasiya prosesini keçməsi üçün ən azı 4–5 tur tələb olunur. Bu gün də xal qazanacağımıza ümid edirdim. Qarşıdakı oyunlarda da maksimum nəticə üçün mübarizə aparacağıq.