Azərbaycan Premyer Liqasının I turunda “Araz-Naxçıvan”la heç-heçə edən (0:0) “İmişli”nin baş məşqçisi Fərid Namazov oyundan sonra keçirilən mətbuat konfransında iştirak edib.
Prosport.Az xəbər verir ki, gənc mütəxəssis görüş barədə düşüncələrini bölüşüb.
– Çempionatın ilk turları həmişə çətin olur. Nə qədər yoldaşlıq matçı keçirsən də, rəsmi oyunun ritmini, gərginliyini və məsuliyyətini hiss etmək tam başqa məsələdir. Bərabər mübarizə izlədik. Həm bizim, həm də “Araz-Naxçıvan”ın yaxşı epizodları var idi. Taktiki baxımdan istər hücumda, istərsə də müdafiədə istədiklərimizi yerinə yetirməyə çalışdıq. Püşk atılandan rəqibi analiz edirdik, lakin əsas hədəfimiz rəqibin qabağını almaqdan çox, öz oyunumuzu inkişaf etdirmək idi. Hər iki tərəf qələbə qazana bilərdi. Yaxşı müqavimət göstərdikləri üçün rəqibə təşəkkür edirəm.
Fərid Namazov ardınca jurnalistlərin suallarını cavablandırıb.
– Çempionatın ən gənc baş məşqçisi kimi Premyer Liqa matçına komanda çıxarmaq necə bir hissdir?
– Əlbəttə, xoş hissdir. Yaş məsələsini özüm də çox qabartmaq istəmirəm, bu stereotipi beynimdən atmağa çalışıram. Əgər bu səviyyəyə gəlib çıxmısansa, yaş bir kənarda qalır və digər mütəxəssislərlə rəqabətə qoşulursan. Burada heç kim sənə güzəşt etmir. Diqqətimi tam olaraq həm özümün, həm də komandanın inkişafına yönəltmişəm.
– Önümüzdə təzyiqli və stresli bir mövsüm var. Siz və komandanız bu gərginliyə nə dərəcədə hazırsınız?
– Çempionatın hansı axarda keçəcəyi 3–4 turdan sonra məlum olacaq. Çünki hazırda komandalar haqqında məlumatlarımız daha çox şifahidir. Əlbəttə, kənardan gözləntilər və müəyyən gərginlik olacaq, bu da futbolun tərkib hissəsidir. Uğur qazananda təriflənirsənsə, uğursuzluq zamanı iradları qəbul etməlisən. Tənqidlərə açığam, çünki xaricdən gələn təsir və tənqid olmadan inkişaf etmək mümkün deyil.
– Komanda oyununa görə “İmişli” daha üstün təsir bağışladı. Bu xala görə üzüldünüz?
– Xüsusən standart vəziyyətlərdən yaxşı fürsətlərimiz oldu, çünki bunun üzərində çox işləyirik. Qol vursaydıq əla olardı, lakin tam qələbəyə layiq idik desəm, ədalətsizlik olar. Rəqibin də hər iki hissədə təhlükəli epizodları var idi. Düzdür, rəqibin xüsusilə sol cinahdan, Məhəmməd Maranın olduğu tərəfdən hücum edəcəyini bilirdik, amma bəzən əvvəlcədən gördüyün təhlükənin də qarşısını ala bilmirsən. Yekunda bərabərsəviyyəli oyun getdi.