Azərbaycan Premyer Liqasının I turunda “Turan Tovuz”a məğlub olan (0:1) “Qəbələ”nin baş məşqçisi Kaxaber Sxadadze oyundan sonra keçirilən mətbuat konfransında iştirak edib.
Prosport.Az xəbər verir ki, gürcüstanlı mütəxəssis görüş barədə düşüncələrini bölüşüb.
– Mövsümün başlaması münasibətilə hər kəsi təbrik edirəm. Avrokuboklarda uğurlu nəticələr əldə edən “Sabah” və “Qarabağ”a növbəti mərhələdə də uğurlar diləyirəm. Bugünkü oyunda 3 xal qazanan “Turan Tovuz”un da haqqını vermək lazımdır. Maraqlı və bərabər mübarizə izlədik. İlk hissədə yol verdiyimiz bir səhvdən sonra rəqib fərqləndi. İkinci yarıda isə rəqibi sıxdıq, daha üstün futbol oynadıq. Sadəcə son ötürmələrdə və zərbələrdə soyuqqanlılıq çatmadı. Biz bu heyətlə demək olar ki, ilk rəsmi matçımıza çıxırdıq. Yoldaşlıq görüşlərində birgə oynamamışdıq. Buna baxmayaraq, komandada böyük potensial gördüm. İnanıram ki, növbəti turlarda daha yaxşı nəticələr əldə edəcəyik. Bizi dəstəkləmək üçün uzaq məsafə qət edən azarkeşlərimizə də minnətdaram.
Təcrübəli çalışdırıcı ardınca jurnalistlərin suallarını cavablandırıb.
– 2 mərkəz hücumçusu ilə oynamaq sevdiyiniz üslubdur, yoxsa digər futbolçuların yoxluğundan bu taktikaya üstünlük verdiniz?
– Meydana hücumameyilli heyətlə çıxmışdıq. İrəlidəki forvard cütlüyündən başqa, Bruno və Meşak kimi iki pleymeykerə şans verdik. Sərəncamımızda belə keyfiyyətli hücumçular ola-ola onları kənarda saxlamaq günah olardı. Təbii ki, bu taktika müdafiə xəttindəki futbolçuların üzərinə əlavə yük saldı. Bruno komandaya yeni qoşulduğu üçün fiziki baxımdan tam hazır deyil, bu səbəbdən onu əvəzlədik. Meşak isə arxa xəttə xeyli kömək etdi. Digər matçlarda fərqli sistemlərdən istifadə edə bilərik, amma bu gün seçdiyimiz taktika doğru idi. Sadəcə yaradılan imkanları qolla yekunlaşdıra bilmədik.
– Ehtiyat skamyada əsasən akademiyanın gəncləridir. Heyəti gücləndirmək üçün yeni transferlər gözlənilir?
– Heyətə çoxlu yetirməni cəlb edirik. Məsələn, Ziya Şəkərxanov matça çox yaxşı qoşuldu və oyunu canlandırdı. Ötən mövsüm də gənclərə yetərincə şans vermişdik. Bu gün də ehtiyat skamyamızda yer alan 6–7 futbolçunun yaşı 20–21 civarında idi, lakin rəqabəti artırmaq üçün güclənməyə ehtiyac var. Bəzi mövqelər var ki, ora təcili oyunçu lazımdır.
– Start heyətdə cəmi iki yerli futbolçunun yer alması nə ilə bağlıdır?
– Yerli futbolçulara əlbəttə şans verəcəyik. Bu gün belə bir heyətlə çıxmağı məqsədəuyğun saydıq. Bütün futbolçular hazır olmalıdır. Ötən mövsüm bəzən 5 yerli oyunçu ilə də çıxırdıq. Növbəti matçlardakı taktikadan və gedişatdan çox şey asılı olacaq.
– Yeni mövsümdə komandanın əsas hədəfi nədir?
– Komandada böyük işıq görürəm. Ötən mövsümü 3-cü pillədə bitirən rəqiblə başabaş oynadıq, hətta bəzi anlarda üstün tərəf idik. Çıxıb hər oyunda 3 xal üçün döyüşəcəyik. Bu cür xarakter göstərsək, istədiyimiz nəticələri əldə edə biləcəyik.
– I Liqadan gəlib Premyer Liqada iddialı olmaq psixoloji cəhətdən necə təsir edir?
– Həyat belədir, güclü olub mübarizə aparmalısan. Mənim kifayət qədər təcrübəm var, bu baxımdan heç bir problem yoxdur. Əsas odur ki, özümə və komandama inanıram.