Kiyev “Dinamo”su UEFA Konfrans Liqasının III təsnifat mərhələsində “Qarabağ”a məğlub olaraq avrokuboklarla vidalaşıb.

Prosport.Az Ukrayna mediasına istinadən xəbər verir ki, ilk oyunda 1:0 hesabı ilə qalib gələn Kiyev təmsilçisi Bakıda keçirilən cavab qarşılaşmasında 0:2 hesabı ilə uduzub və mübarizəni dayandırıb.

Bu nəticə “Dinamo” üçün tarixi antirekordla nəticələnib. Kiyev klubu sonuncu dəfə 2005/06 mövsümündə avrokubokların bu qədər erkən mərhələsində mübarizədən kənarda qalmışdı. Həmin vaxt komanda İsveçrənin “Tun” klubuna məğlub olmuşdu.

Bundan sonra “Dinamo” hər mövsüm ən azı avrokubokların pley-off mərhələsinə qədər irəliləməyi bacarmışdı. “Qarabağ”a məğlubiyyətlə bu 21 illik seriya başa çatıb.

Bundan əlavə, “Dinamo” 1992-ci ildən sonra ilk dəfə ilk oyunda üstünlük əldə etdiyi iki matçlıq qarşılaşmada mərhələni keçə bilməyib. Buna qədər Kiyev təmsilçisi belə vəziyyətdə olduğu 11 cütün hamısında növbəti mərhələyə yüksəlmişdi.

Beləliklə, “Qarabağ” həm “Dinamo”nu avrokuboklardan kənarlaşdırıb, həm də Kiyev klubunun uzunmüddətli uğurlu seriyalarından ikisinə son qoyub.