Kiyev “Dinamo”sunun əfsanəvi futbolçularından olmuş Oleq Kuznetsov UEFA Konfrans Liqasının III təsnifat mərhələsində “Qarabağ”la keçiriləcək cavab oyunu barədə fikirlərini bildirib.

Prosport.Az xəbər verir ki, yerli mətbuata danışan veteran müdafiəçi Bakıda “Dinamo”nu çətin qarşılaşmanın gözlədiyini deyib:

“Oyunun çətin olacağını demək üçün falçıya getməyə ehtiyac yoxdur. “Qarabağ” öz meydanında, ilk dəqiqələrdən hücum etmələrini tələb edəcək azarkeşlərinin dəstəyi ilə oynayacaq. Əminəm ki, cavab matçı ilk görüşdən daha aqressiv keçəcək. İnternetdə oxuduğuma görə, ilk oyundan əvvəl azərbaycanlı jurnalistlər və ekspertlər, demək olar, yüz faiz “Qarabağ”ın qalib gələcəyinə əmin idilər və yalnız hesabın necə olacağını düşünürdülər.

Amma hamımız gördük ki, indiki “Qarabağ” ötən mövsüm Çempionlar Liqasında səs-küy yaradan komanda deyil. Azərbaycan klubu bir neçə aparıcı futbolçusunu satıb və onların yoxluğu hiss olunur. İlk növbədə Şotlandiyanın “Seltik” klubunun 5,5 milyon avroya aldığı hücumçu Durandan söhbət gedir”.

Kuznetsov ilk görüşdə əldə olunan 1:0 hesablı üstünlüyə baxmayaraq, “Dinamo”nun Bakıda yalnız müdafiə olunmasını düzgün hesab etmədiyini bildirib: "Görünür, “Dinamo” ehtiyatlı oynayacaq. Amma bilirsiniz, mən hələ oyunöncəsi tapşırıq zamanı "öz cərimə meydançamızda oturub yalnız müdafiə olunacağıq" deyən məşqçi görməmişəm. Böyük ehtimalla, əsas diqqət müdafiəyə yönələcək, amma bu, qapalı müdafiə olmayacaq. Sürətli əks-hücumlara üstünlük veriləcək".

Qeyd edək ki, “Qarabağ” – “Dinamo” oyunu bu gün Tofiq Bəhramov adına Respublika stadionunda keçiriləcək və saat 20:00-da başlanacaq. İlk görüşdə Kiyev təmsilçisi 1:0 hesabı ilə qalib gəlib