Azərbaycan Premyer Liqasında liderlər qrupunda yer alan "Sumqayıt" ilk dəfə büdrəyib.

Prosport.Az xəbər verir ki, bu gün Mərdəkandandakı "Dalğa Arena"da IV tura start verilib.

Mövsümün ilk 2 matçında qələbə qazanmış “Sumqayıt” yenidən elitaya qayıdan “Araz-Naxçıvan”ın qonağı olub. Baş hakim Kamal Umudlunun idarə etdiyi görüşün ilk hissəsində qapılara qol vurulmayıb.

Hesabı 63-cü dəqiqədə “gənclik şəhəri” təmsilçisi açıb. Rövlan Muradov penalti zərbəsini dəqiq yerinə yetirib. Lakin Samir Abbasovun yetirmələrinin üstünlüyü cəmi 9 dəqiqə çəkib. 72-ci dəqiqədə Turan Manafov cərimə zərbəsindən baxımlı qolla “status-kvo”nu bərpa edib.

Bu həm də qarşılaşmada vurulan son qol olub. Səfərdə 1:1 hesablı heç-heçə edən “Sumqayıt” mövsümdə ilk dəfə xal itirib. 3 görüşdən sonra komandanın hesabında 7 xal var. “Araz-Naxçıvan” isə xallarının sayını 4-ə yüksəldib.

Qeyd edək ki, turun digər oyunları avqustun 26-27-də keçiriləcək.