“Neftçi” növbəti transferini rəsmiləşdirib.

Prosport.Az xəbər verir ki, “ağ-qaralar” Macarıstanın “ZTE” klubundan Alen Şkribeki heyətinə cəlb edib. 25 yaşlı hücumameylli yarımmüdafiəçi ilə 2+1 illik müqavilə imzalanıb.

Şkribek karyerası ərzində yalnız Macarıstan klublarında çıxış edib. Futbolçu 2026/27 mövsümündə ölkə çempionatının ilk 3 turunda bütün oyunlarda meydana çıxıb və 3 məhsuldar ötürmə ilə yadda qalıb. Ötən mövsüm isə “ZTE”nin heyətində 37 matçda 11 qol və 5 assistə imza atıb.

Universal futbolçu olan Şkribek yarımmüdafiənin mərkəzində və “10 nömrə” mövqeyində çıxış etməklə yanaşı, hər iki cinahda da oynaya bilir.

Qeyd edək ki, Alen Şkribek 2023/24 mövsümündə “Pakş”la Macarıstan Kubokunun qalibi olub. O, 2021-2022-ci illərdə Macarıstanın U-21 millisində 11 oyun keçirib, 2 qol vurub və 3 məhsuldar ötürmə edib.