Ukrayna “Dinamo" (Kiyev) klubunun prezidenti İqor Surkis “Qarabağ”la UEFA Konfrans Liqasının III təsnifat mərhələsinin ilk oyunundan əvvəl futbolçularla sərt və emosional söhbət edib.
Prosport.Az xəbər verir ki, bu barədə Ukraynanın tanınmış idman jurnalisti və “TaToTake” verilişinin aparıcısı Mixail Spivakovski danışıb.
Onun sözlərinə görə, Surkis “Qarabağ”la vacib qarşılaşma ərəfəsində komandanın paltardəyişmə otağına daxil olaraq futbolçularla ciddi söhbət aparıb. Klub prezidentinin əsas məqsədi oyunçuların motivasiyasını və meydandakı mübarizə əzmini artırmaq olub.
Spivakovski komanda daxilində baş verənləri belə təsvir edib: “Futbolçuların dediklərindən bildiyimə görə, “Qarabağ”la oyundan əvvəl klub prezidenti İqor Surkis paltardəyişmə otağına gəlib. Orada, dostlar, elə bir “pistonizasiya” olub ki, çoxdan belə bir şey olmamışdı”.
Jurnalistin istifadə etdiyi “pistonizasiya” ifadəsi futbolçuların sərt şəkildə danlanması, onların özlərinə gətirilməsi və qarşıdakı oyuna maksimum köklənmələri mənasında işlədilib.
Spivakovskinin sözlərinə görə, Surkisin komandaya müraciətindən sonra futbolçuların meydandakı davranışında da ciddi dəyişiklik hiss olunub.
“Dinamo"nun oyunçuları qarşılaşmanın ilk dəqiqələrindən daha fəal, aqressiv və mübariz oynamağa başlayıblar. Jurnalist hesab edir ki, paltardəyişmə otağındakı emosional söhbətin yaratdığı psixoloji impuls futbolçuların meydandakı çıxışına birbaşa təsir edib: “Onlar meydana çıxanda həmin “pistonizasiya”nın inersiyasını görürsən. İnsanlar normal şəkildə qaçırdılar”.
Onun sözlərindən belə nəticə çıxır ki, klub rəhbərliyinin müdaxiləsi komandada yaranmış müəyyən psixoloji durğunluğu aradan qaldırmağa kömək edib. Xüsusilə avrokuboklarda nəticənin və növbəti mərhələyə keçidin böyük əhəmiyyət daşıdığı bir vaxtda futbolçuların maksimum səfərbər olunması “Dinamo" üçün vacib idi.
İqor Surkisin komandaya sərt müraciətindən sonra “Dinamo" meydanda daha yüksək temp və mübarizə nümayiş etdirib.
Kiyev təmsilçisi “Qarabağ”la qarşılaşmada minimal hesablı qələbə qazanıb – 1:0. Bu nəticə Ukrayna klubuna avqustun 13-də Tofiq Bəhramov adına Respublika stadionunda keçiriləcək cavab görüşü öncəsi müəyyən üstünlük qazandırıb.