"Turan Tovuz"un baş məşqçisi Qurban Berdiyev ilə Rusiyanın tanınmış klubu maraqlanır.

Prosport.Az xəbər verir ki, Moskva "Lokomotiv"inin 73 yaşlı mütəxəssisin namizədliyini nəzərdən keçirdiyi bildirilir. Bu barədə futbol agenti Timur Qurtskaya məlumat yayıb.

Onun sözlərinə görə, "Lokomotiv"də Mixail Qalaktionovun mümkün istefası fonunda Berdiyevin adı klubla yanaşı hallanır: "Bir namizədin adı dolaşır, amma mən buna inanmıram. Berdiyev haqqında danışırlar. Qulağımın ucuyla eşitmişəm ki, Qurban ilə bağlı belə söhbətlər var. Ən məntiqlisi, "Lokomotiv"in Çerçesovu gətirməsi olardı. Lakin o, hazırda "Axmat"ı çalışdırır. Berdiyev Azərbaycan çempionatında işləyir, ancaq yəqin ki, onu oradan gətirmək, Çerçesovu "Axmat"dan əldə etməkdən daha asandır".

Qeyd edək ki, 2026/27 mövsümünə uğursuz başlayan "Lokomotiv" Rusiya Premyer Liqasında 3 turdan sonra 2 xalla 12-ci pillədə qərarlaşıb. "Dəmiryolçular" növbəti turda "Orenburq"a qalib gəlməyəcəyi halda, Mixail Qalaktionovun istefaya göndəriləcəyi gözlənilir.