“Yayımla bağlı ortaya çıxan problemdə “İdman TV" qədər “Qarabağ” klubu da məsuliyyət daşıyır”.

Prosport.Az  xəbər verir ki, bu barədə “İdman TV" UEFA Avropa Liqasının pley-off mərhələsində “Qarabağ”ın Sloveniya klubu “Olimpiya” ilə keçirdiyi səfər oyunu zamanı yayımda yaranmış problemlə bağlı bəyanatda bildirib.

Telekanal rəhbərliyi məsələ ilə bağlı yaxın müddətdə Azərbaycan çempionunun rəsmiləri ilə görüş keçirməyi planlaşdırır: “Olimpiya” – “Qarabağ” görüşünün “İdman TV" vasitəsilə göstərilməməsindən narahatlığınızı və iradlarınızı başa düşür, üzr istəyirik. “Qarabağ” klubundan fərqli olaraq, biz yaranmış problemin əsl mahiyyətini araşdırmadan kimisə ittiham etmək istəmirik. Odur ki, ən yaxın zamanda klub rəhbərləri ilə AzTV rəhbərliyi arasında görüş keçiriləcək”.

Onu da bildirək ki, "Qarabağ" klubu dünən matçın gedişatında açıqlama yayaraq, matçın yayımında olan problemin telekanalın məsuliyyətində olduğunu bildirib: "Hörmətli azarkeşlər! “Olimpiya” – “Qarabağ” qarşılaşmasının yayım hüququnun öhdəliyini “İdman” kanalı öz üzərinə götürmüşdür. Lakin texniki səbəblərdən “İdman” bu oyunu canlı yayımlandıra bilmir. Yayımla bağlı məsuliyyəti birbaşa “İdman” kanalı daşıyır".

Oyundan sonra isə klub prezidenti Tahir Gözəl açıqlama yayıb: “Qarabağ”ımızın bu mövsüm ən həyəcanlı, maraqlı, sürətli oyunlarından biri oldu. 2:0 hesabı böyük üstünlükdür, amma Bakıda azarkeşlərimizin önündə cavab görüşü də var. Çox istəyərdim ki, xalqımız qarşılaşmanı böyük həyəcanla televiziyadan izləsin. Əlbəttə, matçın ölkəmizdə yayımlanmaması məni də üzdü. İnşallah, bu möhtəşəm oyun və mübarizəni Bakıda da görəcəyik. Bu möhtəşəm qüruru hamımız birlikdə yaşayacağıq”.

Qeyd edək ki, “Qarabağ”ın 2:0 hesabı ilə qalib gəldiyi qarşılaşma 69-cu dəqiqədən etibarən yayımlanıb.