“Yaxşı oldu ki, qalib gəldik. Amma çoxlu səhvlər etdik və onları düzəltməliyik”.

Prosport.Az xəbər verir ki, bunu Ukraynanın “Dinamo" (Kiyev) komandasının futbolçusu Matvey Ponomarenko Polşada “Qarabağ”a 1:0 hesabı ilə qalib gəldikləri UEFA Konfrans Liqasının III təsnifat mərhələsinin ilk oyunu barədə danışarkən deyib.

Qələbə qolunun müəllifi bildirib ki, komanda oyundakı səhvlərini düzəltməlidir: “Düşünürəm ki, topla daha çox oynamalıyıq. Bunun üzərində çalışacağıq. Əsas odur ki, bu gün qalib gəldik və komanda yaxşı əhval-ruhiyyədə növbəti oyuna hazırlaşacaq. Bu gün minimal üstünlük qazandıq. Bakıda da qalib gəlməyə və mərhələni keçməyə çalışacağıq”.

20 yaşlı hücumçu qələbə qolunun necə vurulmasından da danışıb: “Gördüm ki, meydanın mərkəzində topu ələ keçirdik və sürətli əks-hücum üçün imkan yarandı. Castin Lonveyk mübarizə apardı. Topun mənə tərəf gəldiyini gördüm, qol vura biləcəyimi hiss etdim, irəli qaçdım və topu qapıya göndərdim. Allaha şükür, top tora düşdü və mən də qolsuzluq seriyasına son qoydum. Ümid edirəm ki, bu oyunda bəxtim açıldı və bundan sonra daha çox qol vuracağam, hər oyunda fərqlənməyə başlayacağam”.

Futbolçu baş məşqçi İqor Kostyukun final fitindən sonra ona yaxınlaşmasından da söz açıb: “Kostyuk məni vurduğum qola görə təbrik etdi və oyuna görə təşəkkürünü bildirdi”.