"Danimarkada olduğumuza görə çox şadıq. Hər məşqçinin arzusudur ki, ən azı Çempionlar Liqasında bu mərhələyə qədər gəlib çıxa bilsin".

Prosport.Az xəbər verir ki, bu sözləri "Sabah"ın baş məşqçisi Valdas Dambrauskas Danimarkada "Orxus"a qarşı keçirəcəkləri UEFA Çempionlar Liqasının III təsnifat mərhələsinin ilk oyunundan əvvəl mətbuat konfransında deyib.

Litvalı mütəxəssis güclü rəqibə qarşı çıxış edəcəklərini bildirib: "Sabahkı qarşılaşmaya çox yaxşı hazırlaşmışıq. Rəqibimizi çox yaxşı təhlil etmişik. "Orxus" çox keyfiyyətli futbolçulardan təşkil olunub. Rəqibin zəif və güclü tərəflərini bilirik. Çalışacağıq ki, biz öz gücümüzdən istifadə edək və səfərdə qələbə qazanaq. İnanıram ki, futbolçularım ən xırda tapşırığı belə düzgün icra edəcəklər".

O, qitənin ən nüfuzlu klub turnirinin pley-off mərhələsindəki potensial rəqibləri barədə də danışıb: "Çempionlar Liqasındakı potensial rəqiblərimizi də artıq bilirik. Lakin onlar barədə indidən danışmağın mənası yoxdur. Hazırda bütün fikrimizi "Orxus"la matça yönəltmişik. Rəqibimizə hörmətlə yanaşırıq. Onlar son Danimarka çempionudurlar".

Dambrauskas "Sabah"dan ayrılaraq İsveçrənin "Bazel" klubuna transfer olunan Aaron Maludaya təşəkkür edib: "Bu futbolçu çox gənc yaşlarında bizim sıralarımıza qoşuldu və komandaya böyük köməyi dəydi. Təbii ki, bu kömək qarşılıqlı idi. Çünki Maluda "Sabah" komandasının sayəsində "parladı". Komandamız onun satışından gəlir əldə etdi. Son olaraq Kristian Nvaçukvunu transfer etdik. Bu da onu göstərir ki, "Sabah"ın skaut heyəti çox sürətli və lazımı formada işləyir".

Qeyd edək ki, "Orxus" - "Sabah" matçı sabah Bakı vaxtı ilə saat 20:30-da Ranners stadionunda keçiriləcək. Komandalar arasında cavab matçı avqustun 11-də saat 20:00-da Masazırdakı "Bank Respublika Arena"da təşkil olunacaq.