"Qarabağ" Avropa Liqası pley-off mərhələsinin cavab görüşü çərçivəsində Sloveniyada "Olimpiya"nı 2:0 hesabı ilə məğlub edib.

Prosport.Az xəbər verir ki, matçdan sonra keçirilən mətbuat konfransında Ağdam təmsilçisinin baş məşqçisi Qurban Qurbanov açıqlama verib:

– Futbolçularımı təbrik edirəm. Ümumən çox yaxşı oyun keçdi. Hər 2 komanda topla davranmağı xoşlayırdı. Maraqlı, düşünülmüş hücumlar oldu. Bu hələ ilk oyundur. Buradakı qarşılaşmadan sonra "Olimpiya"ya daha ciddi yanaşmalıyıq. Çünki bu komandanın potensialı çox böyükdür. Rəqib istənilən an təhlükəli vəziyyətlər yaradırdı. Bu oyun bizi arxayınlaşdırmalı deyil. Bakıdakı matçda çox ciddi olacağıq. Qarşıdakı 90 dəqiqədə xeyli güc sərf etməliyik.

– Əsas hansı komponentdə "Olimpiya"nı üstələdiniz?
– Bəlkə də burada deməyim düzgün olmaz. Oyunun əvvəlində düşündüyümüz pressinqi edə bilmədik. Amma get-gedə oyunun meydanın rəqibə aid olan hissəsində qura bildik. Burada pressinqimiz pis alınmadı. "Olimpiya"nı qapımıza yaxın buraxanda dərhal təhlükə yarada bilirdilər. Bəlkə də ən vacib komponent bu oldu.

– İlk qolu standard vəziyyətdən başla vurdunuz. Bu, "Qarabağ"a xarakterik olan bir qol deyildi. Bunun üzərində işləmişdiniz?
– Biz bütün komponentlərin üzərində hazırlaşırıq. Bəli, bu gün bu daha uğurlu oldu. Deməzdim ki, oyunu sırf bunun üzərində qurmuşduq. Amma daha çox buna üstünlük vermişdik. Uğurlu ötürmə və uğurlu qol oldu.