I Liqa klubu "Mingəçevir"in sahibi dəyişib.

Prosport.Az-ın xəbərinə görə, yeni baş məşqçi Elman Sultanov olacaq.

O isə Rusiyada yaxın dostu olan iş adamını bu kluba cəlb edib. Bununla da 2025-ci ilin yanvarından kluba rəhbərlik edən Rafael Bunyatov tamamilə klubdan geri çəkilib. 

Əslində klubun onun əlindən alınmasına və rəsmi təhvil-təslimə ehtiyac da olmayacaq. Çünki Rafael Bunyatovun gəlişindən sonra rəhbəri olduğu ASTA-nı klubun adına əlavə edə bilməməsi, özünü isə təsisçi kimi rəsmi sənədə saldıra bilməməsi bu proseduru daha da asanlaşdırıb. Hazırda klubun təsisçisi rəsmi sənədlərdə Nurlan Əhmədov olaraq qalır.

Sadəcə, yeni sponsor əvvəlki rəhbərlikdən qalmış 250 min manat borcu da ödəməyə məhkumdur. Böyük ehtimalla, bunun da ödənilməsinə razılıq verilib. Klub yeni mövsümdə Premyer Liqaya iddialı olmayacaq. "Mingəçevir" daha çox orta sıralarda yer almağa çalışacaq.

Yeri gəlmişkən, Elman Sultanovun I Liqanın digər klubu "Cəbrayıl"dan geri çəkilməsinin səbəbi də bəlli olub. O, klubu sözügedən dostu vasitəsilə almaq üçün – təsisçilər Cavid Hüseynov və Şahin Məmmədovla razılaşıb. 450 minə razılıq olub. Lakin son anda araya AFFA-nın sabiq baş katibi Elxan Məmmədov girib. O, Cavid Hüseynovdan klubu vaxtı ilə "Kəpəz"ə rəhbər gətirdiyi İlqar Nadiriyə satmasını istəyib.

Klubun adının "Gəncəbasar" qoyulması da gəncəli İlqar Nadirinin ideyasıdır. Lakin "Səbail" ("Quba"ya dəyişdirilməlidir) kimi klubun adı hələ ki dəyişdirilə bilməyib. Ona görə də bu gün saat 15:00-da başlayacaq püşkatmada klubun adı "Cəbrayıl" kimi təqdim olunacaq.

Səbuhi Musa