Konqo əsilli almaniyalı futbolçu Coy-Lans Mikelsin "Sabah" haqqında paylaşımı klubun dünən bəyanat yayması ilə yadda qaldı.

Abşeron təmsilçisi futbolçunun yalan danışdığını bildirməklə bərabər, onun posterinin aradan qaldırılmadığını bəyan etdi: "Mikels açıqlamasında stadiondan şəkillərinin götürülməsini də iddia edib. Qeyd edək ki, əslində hər bir klub ayrılmış futbolçusunun şəklini reklam bannerlərindən çıxarmaq hüququna malikdir və bu dünyanın heç bir yerində həmin oyunçuya qarşı hörmətsizlik kimi qəbul edilmir. Lakin Mikelsin iddialarının əksinə olaraq, hazırda onun posterləri stadionun ən çox azarkeş cəmləşən hissələrində qalmaqdadır və oyunlarımıza gələn tamaşaçılar da çox güman bunun şahidi olublar".

Prosport.Az bu məsələni araşdırmaq üçün Masazır qəsəbəsində yerləşən "Bank Respublika Arena"dakı həmin posterə nəzər yetirib. Məlum olub ki, həmin poster klubun rəsmi mağazasının yerləşdiyi butikin üzərində hələ qalmaqdadır. Həmin fotonu təqdim edirik:

Qeyd edək ki, Coy-Lans Mikels "Sabah"ı 300 min avro qarşılığında Səudiyyə Ərəbistanının I divizion klubu olan "Əl-Feysəli"yə dəyişib.