Qərb derbisi. Afişa olaraq çox gözəl səslənir. Dünən Gəncədə canlı izlədiyim oyun derbi ab-havasında idimi? Bu barədə az sonra...

Gəncədə hər zamankı kimi matç öncəsi ab-hava əla görünür. Hələ oyundan əvvəl Gəncə küçələində niva ilə oyuna gələn tovuzlu azarkeşi görürəm. "Turan Tovuz" şərfini qoluna bağlamış sürücü qolunu pəncərədən çıxarıb, qonaq komandanın azarkeşi olduğunu fəxrlə gəncəlilərə nümayiş etdirir. Gəncəli azarkeşlər isə kassa qarşısında növbə yaradıb. Əllərində matç bileti olan şəxslər var. Övladları ilə oyuna gedirlər. Biz də kameramızın yaddaşına bunu həkk edirik. Deyəsən, azarkeş baxımından ab-hava əla olacaq.

Stadionun darvazalarından içəri daxil oluruq. Kölgənin düşdüyü hissədə qurulmuş tribunaların hansı salamatdırsa, demək olar ki, tutulub. Amma gün düşən hissədə yer alan tribunalarda azarkeş sayı çox olsa da, oradakı coşqu tam başqadır. Çünki orada "Xəmsə" və "Kapaz Ultras" fanklubları yer alıb. Stadionun şərq tribunasında isə Tovuzdan gəlmiş azarkeşlər görünür. Onlar da "Ultras Turan" banneri açıb. Yeri gəlmişkən, yeni mövsümdən "CBC Sport"un daha çox azarkeşin yer aldığı yerdən çəkiliş edəcəyi deyilsə də, tam əksini görürük. 

Keçək oyuna. Ancaq bundan əvvəl haşiyə çıxaraq qeyd edim ki, ölkədəki internet problemi Gəncə şəhər stadionunda da bariz şəkildə özünü göstərir. Oyun ərzində internet sayta material ötürməyə mane olur. Ölkənin 2-ci böyük şəhərinin stadionunda. Nonsens! Elə ölkənin tarixinə görə 2-ci böyük klubunun da subyektiv və obyektiv səbəblərdən sponsorsuz qalması rüsvayçılıqdır. Bir "başpapaqlı" tapılmır ki, kluba yiyə dursun.

Bununla belə, azarkeşlər ümidlidirlər. Axı, ilk turda komanda bu meydanda yenilənən və çempionluğa iddialı olacağı gözlənilən "Neftçi"ni yenilgiyə uğradıb. Elə matç da Azər Məmmədovun yetirmələrinin o qalib psixologiyası ilə başlayır. Bəstəboy Abdullahi Şuaybunun ifasında "Kəpəz"in bir neçə təhlükəli hücumları göz oxşayır. Aha, deyəsən, nəsə olacaq. Lakin "Turan Tovuz"un yeni transferi Martin Petkov və Belaydi Pusi hadisələrin məntiqi gedişatına uyğun olmayan şəkildə meydan sahiblərini məyus edir. Bolqar futbolçunun aktivində artıq 3 qol var. Daha sonra qonaqlarda Sərtan Taşkın, Gəncə təmsilçisində isə Mate Kvirkvia zədələnərək meydandan çıxdı. İlk hissədə daha bundan əhəmiyyətli epizod olmadı desəm, ifrata varmaram.

2-ci hissənin qıza özəti isə belə idi. "Turan Tovuz" hücum edir, "Kəpəz" isə ara-sıra rəqib qapısına şığıyır, amma nə iləsə yadda qalmırdı. Ümumiyyətlə, tribunada yer alanlar matçın erkən bitməsini istəyirdi. Bunun nəticəsi idi ki, bəzi azarkeşlər fiti gözləmədən stadionu tərk etmək üçün tələsirdi...

İnanın Allaha, oyundan çox, matçın sonunda gördüyüm mənzərə derbiyə daha uyğun gəlirdi. Gəncəli azarkeşlər meydançanı tərk edən tovuzlu azarkeşləri fitə basırdı. "Turan Tovuz"un veteran – 38 yaşlı qapıçısı Kamal Bayramov isə adəti üzrə yerli azarkeşləri qıcıqlandırırdı. Ona paylaşdığımız qısa video vasitəsilə baxmaq imkanınız olacaq...

Amma bizim oyuna baxmaq imkanımız olmadı. Çünki meydandakı oyun deyildi. Heç şübhəsiz ki, bizim gördüyümüz oyun Qərb yox, Dərd derbisi idi. Biz əsl Qərb derbisini isə "Huner Group" kimi bir yerli şirkətin "Kəpəz"ə yaxın durmasından sonra izləyəcəyik. Əks halda, gəncəli azarkeşin dediyi kimi olacaq: "Vaxtı ilə biz "Turan"ı udurduq, indi bunlar bizi udur".

Səbuhi Musa