"Qərb derbisi həmişə maraqlı və gərgin keçir. Havanın isti olması çox çətinlik yaratdı. Bilirdik ki, rəqib ilk dəqiqədən təzyiq edəcək. Futbolçularım soyuqqanlılığını qorudu. Vacib qələbə qazandıq. Gəncədə "Kəpəz"i məğlub etmək çox çətindir. Yolumuza davam edirilk".

Prosport.Az xəbər verir ki, bu sözləri "Turan Tovuz"un baş məşqçisi Ayxan Abbasov Premyer Liqanın III turunun "Kəpəz"lə görüşündən sonra keçirilən mətbuat konfansında deyib. O, komandasının səfərdəki 2:0 hesablı qələbəsi haqda danışıb və jurnalistlərin suallarını cavablandırıb.

– "Araz-Naxçıvan"la oyunun eyni ssenarisi sanki təkrarlandı. Rəqib hücum edirdi, qolları siz vururdunuz. Bu, futbolçularınızın ilk dəqiqələrdə səfər meydançasına adaptasiyası ilə bağlıdır?
– "Kəpəz" 2 oyundur ki, əks-hücumlarda oynayır. Gözləyirdm ki, evdə hücuma atılacaqlar. Belə çətin havada mövqe hücumları önəmlidir. Epizodlardan istifadə etdik.

– İlk hissədə zədələnən Sərtan Taşkının durumu necədir?
– Rəqib futbolçu ilə toqquşdu. Baldır nahiyəsindən zədələnib. Ümid edirəm ki, növbəti matça qədər hazır olacaq.

– 2-ci hissədəki yorğunluq nə ilə bağlı idi?
– Yorğunluq deyildi, sanki boğulma var idi. Bu ay çətindir, ən isti havalardır. Oyunlar axşam vaxtı olsa, bir az rahat olar.

– Stadionunuzdakı işlər nə yerdədir?
– Növbəti oyunu evdə keçirəcəyik. 

– 3 səfər oyunundan 6 xal qazanmısınız. Nəticə sizin üçün qənaətbəxşdir?
– Əlbəttə, xal baxımından əladır. Nəzərə alaq ki, 1 oyunda "Qarabağ"a uduzmuşuq. Digər görüşlərdə qalib gəlmşik. Bunu qoruyub-saxlamaq lazımdır. Çempionatımız çox çətindir. Komandalar bir-birinə yaxındır, hamı digərini məğlub edə bilər. 

– Transfer gözlənilir?
– Bəli, diqqətimizdə olan, danışıq apardığımız futbolçular var. Transfer istəyirik. Ən azı orta xətdə bir futbolçuya ehtiyac var.

– Bütün qolları hücumçularınız vurub. Hücumdakı problemi aradan qaldırdığınızı düşünmək olar?
– Bu gün hücumçulardan razıyıq. Belaydi Pusinin qol vurmasına çox sevindim. Martin Petkov gənc futbolçudur, ondan çox şey gözləyirik. Otto Con zədədən sonra tam bərpa olunmayıb. 

– Bu mövsüm hədəf nə olacaq?
– Orta pillələrdə olmaq (gülür). Bu gün Premyer Liqa Tovuza ab-hava gətirib. Böyümək üçün liqada qalmalıyıq. Yolumuz çətindir. Tək əsas komanda yox, akademiya, infrastrukturla bağlı işlər gedir. Buna görə də Premyer Liqada möhkəmlənmək lazımdır. I liqaya düşsək, işlərimiz yarımçıq qalacaq.