Azərbaycan II Liqasında mübarizə aparacaq komandaların sayı artırılıb.

Prosport.Az-ın məlumatına görə, bu gün keçirilən AFFA-nın növbədənkənar iclasında bu məsələ müzakirə olunub.

Qərara gəlinib ki, Bakı "Dinamo"su və "Şahdağ Qusar"ı yarımpeşəkar, yarımhəvəskar statuslu bu yarışa buraxılsın. "Dinamo" Daxili İşlər Nazirliyi İdman Cəmiyyətinin, "Şahdağ" isə "Azərenerji" Açıq Səhmdar Cəmiyyətinin keçmiş prezidenti Etibar Pirverdiyevin klubu kimi fəaliyyət göstərəcək. 

"Şahdağ Qusar" (görünür, borclara görə "Şahdağ" adından imtina edilib – red.) noyabrın 1-dək qonşu Qubanın Olimpiya İdman Kompleksində çıxış edəcək. Həmin tarixdən etibarən Şövkət Orduxanov adına Qusar şəhər stadionu təmirdən çıxacaq və "Şahdağ Qusar" öz meydanında rəqibləri qəbul etməyə başlayacaq.

Bu qərarla komandaların sayı 14-ə yüksəlib. II Liqada Qusarın 2 komandasının fəaliyyət göstərəcəyini də xatırladaq. Digəri ötən mövsüm AFFA Region Liqasının qalibi olmuş "Qusar"dır.

II Liqada iştirakı öncədən təsdiq olunmuş 12 komanda bunlardır: "Füzuli", "Göygöl", "Ağdaş", "Sportinq Baku", "Qusar", "Marxal Şəki", "Şəfa Baku", "Cəbrayıl", "Lerik", "Kürmük Qax", "Şəmkir" və "Kür-Araz" komandaları da iştirak edəcəklər.

Qeyd edək ki, II Liqanın püşkatması gələn həftə keçiriləcək.