"Səbail" Azərbaycan Premyer Liqasının II turunda səfərdə "Neftçi" ilə 1:1 hesablı heç-heçə edib.

Prosport.Az xəbər verir ki, matçdan sonra keçirilən mətbuat konfransında "dənizçilər"in baş məşqçisi Şahin Diniyev jurnalistlərin suallarını cavablandırıb:

– Çox gərgin oyun oldu. Hər 2 komanda qalib gələ də, məğlub ola da bilərdi. Qarşılıqlı hücumlar şəraitində keçən matç idi. Komandada 7-8 oyunçu ilk dəfədir ki, bir yerdə oynayır. Futbolçuların uyğunlaşması üçün 5-6 matç vacibdir. Taktiki cəhətdən ağıllı oynamağa və ötən turdakı səhvləri etməməyə çalışdıq. Bir neçə qol vəziyyətindən istifadə etsəydik, yaxşı olardı. Hesab oyuna görə oldu. Asan qollar buraxırıq. 2 oyundur ki, qapımıza penaltilər verilir. Kənardan baxırdım, penalti yox idi. Kenni Sayef açıq ayaqla topa getmişdi. Yenə də müdafiəçi cərimə meydançasında sadə oynamalıdır. "Neftçi" qol vəziyyəti yarada bilmirdi. Komandama təşəkkür edirəm, dözdülər. 1 xal da xaldır. Bizim üçün başlanğıcdır. İrəli getməyə çalışacağıq.

– "Səbail"in qapısına verilən penaltidə Rauf Cabbarov VAR-a getmədi...
– Taleyimizdir. Keçən ildən qəbul etmişəm. Belə də gedirik.

– Bununla bağlı şikayət edəcəksiniz?
– Nəyi dəyişəcək? Kimsə cərimə oluna bilər. Amma ötən matçda da belə oldu. Hakimlər səhv edə bilər. Burada simpatiya məsələsi var. Sayef cəriməni 1-ci etmişdi, açıq ayaqla getmişdi. Əks tərəfdə olsaydı, fərqli qərar veriləcəkdi.

– Oyun zamanı "Səbail"in texniki zonasından Qara Qarayevə su atdılar. Nə baş vermişdi?
– Emosiyalarla dolu epizod idi. Ona qədər epizod var idi. Bizdən kimsə suyu yerə atdı, sürüşərək ora getdi. Qaraya qarşı yox, yaranan epizoda görə elə idi. Yəni "Neftçi"nin oyunçularına qarşı deyildi.