Belçikanın paytaxtı Brüsseldə müxtəlif Avropa ölkələrində yaşayan azərbaycanlıların, eləcə də digər millətlərin nümayəndələrindən ibarət həvəskar komandaların iştirak etdiyi minifutbol üzrə III “Suqovuşan” beynəlxalq turniri başa çatıb.

Prosport.Az xəbər verir ki, 24 komandanın qatıldığı yarışda Gürcüstan, Qazaxıstan, Özbəkistan, Ukrayna və Pakistan daxil olmaqla, müxtəlif ölkə və təşkilatların təmsilçiləri mübarizə aparıb.

Turnirdə Estoniyada yaşayan azərbaycanlıları bir araya gətirən “Qarabağ Tallin” komandası da iştirak edib.

Yarışın reqlamentinə əsasən, hər komandaya heyətinə 1 legioner futbolçu daxil etmək imkanı yaradılıb. “Qarabağ Tallin” komandası Estoniya-Azərbaycan “Birlik” icmasının və azərbaycanlı iş adamlarının dəstəyi sayəsində turnirdə iştirak edib.

Komanda turnirdə keçirdiyi 9 oyunun 8-də qələbə qazanaraq qrup və pley-off mərhələlərini uğurla adlayıb. Finala yüksələn Tallin təmsilçisi həlledici qarşılaşmada Belçika azərbaycanlılarının yaratdığı "Qırğı" komandasına məğlub olaraq gümüş medallara sahib çıxıb.

Turnirin diplomatik və beynəlxalq xarakteri də xüsusi olaraq qeyd edilib. Səfirlik komandalarına iştiraklarına və dostluq münasibətlərinə verdikləri töhfəyə görə Azərbaycan milli futbol komandasının formaları təqdim edilib. Formalar FIFA referisi və AFFA-da Beynəlxalq Hakimlik və hakimlərin təlim-tədrisi üzrə baş katibin müşaviri Frank De Blekere tərəfindən təqdim olunub.

Mükafatlandırma mərasimində turnirdə iştirak etmək üçün ən uzaq məsafədən gəlmiş komandalar tədbirin beynəlxalq ruhuna verdikləri töhfə, əzmkarlıq və motivasiyalarına görə “Ən Motivasiyalı Komanda” mükafatı ilə təltif edilib.

Bundan əlavə, "Suqovuşan" Avropa minifutbol turnirinin hər 3 buraxılışında iştirak etdiklərinə və göstərdikləri davamlı dəstəyə görə Belçika Krallığındakı Qazaxıstan Respublikasının Səfirliyi və Belçika Krallığındakı Pakistan İslam Respublikasının Səfirliyi “Sadiqlik və Təşəkkür” mükafatı ilə təltif olunub.