"Qarabağ"ın U-14 komandası İtaliyanın Palmanova şəhərində təşkil olunacaq 9-cu “Fabio Zuccheri Cup” beynəlxalq turnirində iştirak edəcək.

Prosport.Az xəbər verir ki, Azərbaycan təmsilçisi 12 komandanın mübarizə aparacağı yarışda B qrupunda yer alacaq. Komandamız qrup mərhələsində İtaliyanın “Bolonya”, "Karlins Muzane" və Xorvatiyanın “Xayduk” klubları ilə qarşılaşacaq.

Turnirdə iştirak edəcək digər komandalar arasında İtaliyanın “Atalanta”, “Venesiya”, “Udineze”, Bosniya və Herseqovinanın “Zrinski”, Sloveniyanın “Primorye”, həmçinin Xorvatiyanın “Lokomotiva” (Zaqreb) klubları da yer alır.

Reqlamentə əsasən, qrup qalibləri və ən yaxşı nəticə göstərən 2-ci yer sahibi yarımfinal mərhələsinə vəsiqə qazanacaq. Digər komandalar isə 5-12-ci yerlər uğrunda mübarizə aparacaq.

Qrup mərhələsinin oyunları təbii örtüklü "Armando Zimolo Trivinyano" stadionunda keçiriləcək. Oyunlar 20 dəqiqəlik 2 hissədən ibarət olacaq.

"Qarabağ" ilk oyununu iyunun 6-da "Karlins Muzane"yə qarşı keçirəcək, daha sonra isə “Bolonya” və “Xaydukla qarşılaşacaq. Turnirin final mərhələsinin oyunları və bağlanış mərasimi iyunun 7-də baş tutacaq.