Millimizin futbolçusu Mahir Emrelinin çıxış etdiyi Xorvatiyanın "Dinamo" (Zaqreb) komandasının Yunanıstanın paytaxtı Afinada AEK-ə qarşı keçirəcəyi UEFA Çempionlar Liqasının III təsnifat mərhələsinin oyununun yeni tarixi açıqlanıb.

Prosport.Az xəbər verir ki, azarkeş ölümünə görə təxirə salınan qarşılaşma avqustun 18-i və ya 19-da Afinada təşkil olunacaq.

Digər görüş isə əvvəldən planlaşdırıldığı kimi, avqustun 15-də Xorvatiyanın paytaxtı Zaqrebdə oynanılacaq.

Qeyd edək ki, bu günə planlaşdırılan AEK – "Dinamo" oyunundan öncə azarkeşlər arasında kütləvi dava düşüb. Nəticədə Yunanıstan klubunun fanatlarından biri öldürülüb. Bu səbəbdən UEFA qarşılaşmanı təxirə salıb.

14:31

Millimizin futbolçusu Mahir Emrelinin çıxış etdiyi “Dinamo”nun (Xorvatiya) UEFA Çempionlar Liqasının III təsnifat mərhələsində Yunanıstan AEK klubu ilə ilk oyunu təxirə salınıb.

Prosport.Az xəbər verir ki, buna səbəb 2 komandanın azarkeşləri arasında baş vermiş iğtişaşdır.

Yunanıstanın paytaxtı Afinada baş vermiş bu hadisə meydan sahiblərinin azarkeşinin ölümünə səbəb olub. Nəticədə UEFA qarşılaşmanın bu gün keçirilməməsini qərara alıb. Həmçinin, qərar verilib ki, təhlükəsizliyə görə komandalar arasında hər 2 oyun azarkeşsiz baş tutsun.

Qeyd edək ki, Afinadakı matçın hansı tarixdə keçirilməsi hələ ki UEFA-nın saytı vasitəsilə elan edilməyib.