"Neftçi"nin ev oyunlarını keçirdiyi "Bakcell Arena"nın adı dəyişdirilib.

Prosport.Az-ın xəbərinə görə, stadionun adı bundan sonra "Neftçi Arena" olacaq. "Bakcell" şirkəti ilə əməkdaşlıq davam etdirilmədiyindən, 8-ci km qəsəbə stadionu daha belə adlandırılacaq. 11 min azarkeş tutumuna malik stadionda qısa müddətdə demontaj və montaj işləri aparılacaq.

Həmçinin, komanda UEFA Avropa Konfrans Liqasının III təsnifat mərhələsinin "Beşiktaş"la avqustun 10-da keçirəcəyi ev oyununu nə Bakı Olimpiya Stadionunda (BOS), nə də Tofiq Bəhramov adına Respublika stadionunda keçirəcək. Belə ki, BOS-un qazonu UEFA Çempionlar Liqasının II təsnifat mərhələsinin "Qarabağ" – "Rakuf" oyunundan sonra yararsız vəziyyətə düşüb. "Qarabağ" isə HİK-lə UEFA Avropa Liqası matçını "Tofiq Bəhramov"da keçirəcək.

Qeyd edək ki, UEFA bu gün "Neftçi" və "Beşiktaş" arasında keçirilən matçların yerini dəyişib.