"Turan Tovuz" Azərbaycan Kubokunun yarımfinal mərhələsinin "Zirə" ilə oyununa böyük motivasiya ilə çıxacaq.

Prosport.Az sportinfo.az-a istinadən xəbər verir ki, klub rəhbərliyi revanş almaq və finala vəsiqə naminə "kisənin ağzı"nı geniş açıb.

"Turan Tovuz"dan verilən məlumata görə, Ehtiram Quliyev bu məqsədlə 200 min manat mükafat təyin edib. Komanda qarşısına qoyulan məqsədə çatarsa, İdarə Heyətinin sədri bu məbləği daha da artıracağına söz verib.

Bu qarşılaşma Quliyev üçün ikiqat prinsipiallıq daşıyır. Yəqin ki, onun ilk dueldən sonra referi Əliyar Ağayev haqda söylədikləri hələ yaddan çıxmayıb.

Funksioner adıçəkilən baş hakimi məğlubiyyətə əsas səbəbkar kimi göstərib. Mediaya verdiyi açıqlamalarda "qırmızı xətt"i keçdiyi, təxribat xarakterli fikirlər söylədiyi üçün AFFA onu 15 min manat cərimələyib.