"İlk hissədə istədiyimiz oyunu qura bilirdik. Lakin fərdi səhvlərimiz oldu. Oyunda müəyyən keyfiyyət fərqi hiss olunurdu. Amma bu o demək deyil ki, biz bura uduzmağa gəlmişdik. Nəticə bizi üzür. Hər zaman qələbə üçün mübarizə aparırıq və bunun üçün əziyyət çəkirik. Bəzən istədiklərimiz alınır, amma fərdi keyfiyyət amili nəticəyə təsir edir. Bununla belə, bu mənim özümü sığortalamağım üçün bəhanə deyil. Komanda olaraq da səhvlər etdik və 0:4 hesabı ilə məğlub olduq. Gələcəkdə daha yaxşı nəticələr üçün çalışacağıq".

Bunu Prosport.Az-a "Turan Tovuz"un 16 yaşadək komandasının (U-16) baş məşqçisi Ruslan Məmmədov deyib.

AFFA U-16 Liqasının II mərhələsinin XI turunda “Qarabağ” doğma meydanda “Turan Tovuz”u 4:0 məğlub edib.

Matçdan sonra “Turan Tovuz”un baş məşqçisi Ruslan Məmmədov qarşılaşma ilə bağlı fikirlərini bölüşüb. O, bürünc medal üçün mübarizə apardıqlarını bildirib:

"Mövsümü 3-cü və ya 4-cü yerdə başa vurmaq istəyirik. Bunun üçün isə növbəti turlarda həm özümüz uğurlu nəticələr qazanmalı, həm də rəqiblərimizin xal itirməsini gözləməliyik".