Azərbaycanın hava məkanından istifadə etməklə uçuşlar yerinə yetirən yerli və xarici aviaşirkətlərin sərnişin təyyarələrinin GPS peyk naviqasiya sistemlərinə qarşı Rusiya sülhməramlı kontingentinin müvəqqəti yerləşdirildiyi ərazilərimizdəki qeyri-qanuni erməni silahlı dəstələri tərəfindən radiomaneələrin tətbiqi son günlərdə intensivləşib.

Prosport.Az xəbər verir ki, bu müdaxilələrdən biri iyulun 27-i Bakı-Qəbələ və əks istiqamətdə uçuş yerinə yetirən Azərbaycan Hava Yollarının ATR-45 tipli sərnişin təyyarəsinə olub. Belə ki, saat 14:08-dən 14:30-dək və saat 15:04-dən 15:26-dək radiomaneələrin tətbiqi nəticəsində GPS peyk naviqasiya sistemlərində fasilə yaranıb.

Həmin vaxt Bakıdan Qəbələyə gələn təyyarə isə "Qəbələ" futbol klubu ilə UEFA Avropa Konfrans Liqasının II təsnifat mərhələsi üçün oynamağa gələn Kiprin "Omoniya" klubunu götürməli olan təyyarədir. Həmin təyyarə oyundan sonra Qəbələdən çarter reysi ilə Kiprin paytaxtı Nikosiyaya uçub. 

Qeyd edək ki, hava məkanımızdan keçən uçuşların təhlükəsizliyinə ciddi təhdid yaradan bu təxribatlara qarşı Rusiya sülhməramlı kontingenti tərəfindən bu günədək heç bir tədbir görülməyib.