Azərbaycan Premyer Liqasının hazırlığını davam etdirən “Araz-Naxçıvan” növbəti transferini reallaşdırıb.

Prosport.Az xəbər verir ki, İsmail Azzaui Naxçıvan komandasının formasını geyinəcək.

Mərakeş əsilli Belçika vətəndaşı olan yarımmüdafiəçi müxtəlif illərdə "Anderlext"in (Belçika) və "Totenhem"in (İngiltərə) yetirməsi sayılır. O, Brüssel klubunda U-18, London klubunda U-18 və U-21 komandalarında çıxış edib. Sağ cinah hücumçusu 2015-ci ildə 500 min avroya "Totenhem"dən “Volfsburq”a (Almaniya) transfer olunub. Həmin ilin noyabrın 21-də "Verder"ə qarşı oyunun 76-cı dəqiqəsində Daniel Kalicurinin yerinə meydana çıxmaqla Bundesliqada debüt edib.

Niderlandın “Villem II” (icarə) və “Herakles” klublarında da çıxış edib. Karyerası ərzində daha çox diz zədəsi problemi ilə üzləşib. Belçikanın U-15, U-16, U-17 və U-19 millilərində çıxış edib. U-17 ilə 2015-ci ildə dünya 3-cüsü olub.

"Araz-Naxçıvan" 25 yaşlı futbolçu ilə 1 illik müqavilə imzalayıb.