Azərbaycanın 17 yaşadək oğlan futbolçulardan ibarət milli komandasının (U-17) hədəfi Avropa çempionatının seçmə mərhələsinin II raundunda Malta ilə keçirəcəyi oyunda qələbə qazanmaqdır.

Prosport.Az xəbər verir ki, bunu U-17-nin baş məşqçisi Aqil Nəbiyev deyib.

O əvvəlcə Bolqarıstan (1:1) və Litva (0:0) ilə matçları dəyərləndirib: "Bolqarıstanla ilk oyunu üstün keçirən tərəf biz olduq. Rəqibin ən böyük "silahı" standart vəziyyətlər idi. Qolu da məhz bu şəkildə vurdular. Buna baxmayaraq, bərabərlik topunu vura bildik. Qələbə qazanmaq üçün yaxşı imkanlar əldə etsək də, dəyərləndirə bilmədik. Əsas problem son ötürmələr və zərbələrdədir. Bu problemi Litvaya qarşı keçirilən 2-ci matçda da yaşadıq. Başdan sona qədər matça tam diktə etdik, topa daha çox sahib olduq. Hakim də 2 dəfə 100%-lik penaltimizi vermədi. Saysız-hesabsız qol fürsətlərimiz oldu. Futbolçular bu çatışmazlığı aradan qaldırmaq üçün çox çalışmalıdır. Millidə cəmi 3-4 günlük hazırlıqdan sonra oyunlara çıxırıq, bunların üzərində işləməyə vaxtımız olmur".

Aqil Nəbiyev qrupun son turu çərçivəsində martın 30-da autsayder Malta yığmasına qarşı keçiriləcək görüşlə bağlı danışıb: "Əsas odur ki, kollektivdə qələbə əzmi var, futbolçular hər matça qalibiyyət üçün çıxır. İnanıram ki, Malta ilə görüşdə bunu reallaşdıra biləcəyik. Hədəfimiz Malta ilə qarşılaşmada mütləq qələbə qazanmaqdır. Futbolçularda müəyyən yorğunluq var. İstənilən halda, qrupun son matçında yaxşı oynamalı və istədiyimiz nəticəni əldə etməliyik".

Qeyd edək ki, B liqasının 2-ci qrupunda yer alan U-17 millimiz 2 xalla 3-cü pillədə qərarlaşıb.