Əvəzedicilər Liqasının XXI turunun "Qarabağ" – "Sabah" görüşündə insident yaşanıb.

Prosport.Az xəbər verir ki, Binə qəsəbə stadionunda keçirilən matçın gedişində Ağdam klubunun baş məşqçisi Maksim Medvedev futbolçuları meydandan çıxarıb.

Çalışdırıcı bu addımı baş hakim Pərviz İbrahimovun qərarlarına etiraz olaraq atıb. Hadisələr 8-ci dəqiqədə "Sabah"ın bərabərlik qolu zamanı alovlanıb.

Hücumun əvvəlində yan xətt hakimi oyundan kənar vəziyyətə görə bayrağını qaldırıb, ardınca referi fitini səsləndirib, amma fitdən sonra vurulan qol qeydə alınıb. Davamında bir neçə dəfə hakimlər briqadası "Qarabağ"ın əleyhinə qərarlar verib.

Hadisələrin kulminasiya nöqtəsi 43-cü dəqiqədə Mərakeş əsilli belçikalı mərkəz müdafiəçisi Sami Mmaenin qırmızı vərəqə ilə meydandan qovulması olub. Məhz bundan sonra Maksim Medvedev sərt qərar verib, futbolçular meydanı tərk edib.

Oyunda uzun fasilə yaranıb. Rəsmilər çətinliklə Maksim Medvedevi qərarından daşındırıb və yalnız bundan sonra oyun davam etdirilib.

90+5-ci dəqiqədə bu dəfə "Qarabağ"ın futbolçusu Allahverdi Rəhimov qırmızı vərəqə ilə cəzalanıb. 9 nəfərlə qalan "köhlən atlar" sonda 2:1 hesablı qələbə qazanıb.

Matçda texniki zonadan "Qarabağ"dan Maksim Medvedev, "Sabah"dan isə Elmir Ramazanov, Adino Mustedanaqiç və Din Xaliloviç də sarı vərəqə ilə cəzalandırılıb.

"Sabah" bu xal itkisi ilə lider olmaq şansını əldən verib.