"Palms Sports" Futbol Mərkəzində keçirilən "Baku Cup 2026" turnirinin qalibi Moskva "Dinamo"su olub.

Prosport.Az xəbər verir ki, Anatoli Banişevskinin xatirəsinə həsr olunan turnirdə çıxış edən "Qarabağ" 11 yaşadək komandası (U-11) son oyununu keçirib.

"Qarabağ" 3-cü yer uğrunda Voronej "Dinamo"suna (Rusiya) 1:3 uduzub. "Köhlən atlar"ın yeganə qolunu Furqan Hüseynov vurub.

Final oyununda "Kayrat" (Qazaxıstan) və "Dinamo" (Moskva) komandaları qarşılaşıb. Rusiya təmsilçisi 1:0 hesabı ilə qalib gələrək turnirin qalibi olub.

"Beşiktaş" (Türkiyə) 5-ci, "Ulduz" FA 6-cı, "Neftçi" PFK 7-ci və "Göztəpə" (Türkiyə) sonuncu – 8-ci yeri tutub.

Mükafatlandırma mərasimində "Qələbə əzminə görə" mükafatı "Neftçi"nin futbolçusu Salman Səlimova, "Ən yaxşı futbolçu" mükafatı isə Voronej "Dinamo"sunun üzvü Maksim Krutskixə verilib.

"Ən yaxşı qapıçı" mükafatı Ponteley Moriniçev ("Dinamo", Moskva), "Ən yaxşı müdafiəçi" Aleksandr Volodin ("Dinamo", Moskva), "Ən yaxşı yarımmüdafiəçi" Aleksandr Aksyonov ("Dinamo", Voronej), "Ən yaxşı hücumçu" Radmir Ştanko ("Kayrat"), "Ən yaxşı futbolçu" isə Abılay Temirbulatova ("Kayrat") təqdim edilib.

Qeyd edək ki, Anatoli Banişevski və Yuri Kuznetsovun ("Neftçi" və Moskva "Dinamo"sunun sabiq futbolçusu) xatirəsinə həsr olunmuş turnirdə "Qarabağ" B qrupunda "Göztəpə" (Türkiyə) ilə 5:5 oynayıb, meydan sahibi "Neftçi"ni 4:1 məğlub edib, Voronej "Dinamo"suna 1:4 uduzub. Ağdam təmsilçisi yarımfinalda Moskva "Dinamo"suna 1:6 uduzub.