Xorvatiyanın "Vecernji" nəşri "Dinamo" Zaqrebdə çıxış edən Azərbaycan millisinin hücumçusu Mahir Emreli barədə yazı hazırlayıb.

Prosport.Az xəbər verir ki, müəllifi Robert Qeroi olan yazıda 26 yaşlı azərbaycanlı futbolçu barədə müsbət fikirlər qeyd edilib.

"Mahir hamıdan yaxşı hazırlaşsa da, Ante Çaçiç onu görmürdü. İndi isə o, İqor Bişçanın vacib oyunçusu ola bilər" başlıqlı yazıda müəllif qeyd edir ki, Emreli "Dinamo"ya maraqlı oyunçu kimi cəlb olunmuşdu.

"Amma o, göy formada çox matç keçirməyib. Cəmi 25 oyunda meydana çıxıb. Amma bu matçlarda da onun oyun vaxtı az olub. Buna baxmayaraq, o, 6 qol vurmağı bacarıb. Biz yaxşı xatırlayırıq ki, "Ruevitsa" stadionunda Mahir sonradan oyuna daxil oldu və 7:2 hesabı ilə yekunlaşan oyunda 2 gözəl qol vurdu". 

Yazıda "Dinamo"nun sabiq baş məşqçisi Ante Çaçiçin Mahirə dair ciddi planı olmadığı da qeyd edilib: "Gözlənilirdi ki, qış hazırlığından sonra Emreli daha çox oyun şansı qazanacaq. Çünki o, təlim-məşq toplanışının ən yaxşısı idi. Amma sonra başa düşdü ki, oyun şansı az olacaq. Ona görə də Türkiyəyə yollandı. Orada 12 oyun keçirdi, 2 qol vurdu". 

Müəllif daha sonra yazır: "O, "Dinamo"ya böyük inamla qayıtdı. Emreli Bişçanın rəhbərliyi altında Sloveniyadakı təlim-məşq toplanışına yaxşı başladı. Praqa "Sparta"sına qarşı matçda "10" nömrə mövqeyində oynadı və yaxşı çıxış etdi. "İstra 1961" ilə görüşdə isə İqor Bişçan Mahiri əsas heyətə daxil etdi. Və o, böyük Luka İvanuşetslə birgə matçın ən yaxşılarından oldu. Hər biri 1 qol vurdu və qol ötürməsi etdi.

Emreli əsas heyətdə oynamağa layiq idi və bundan istifadə edə bildi. Düzdür, bu o demək deyil ki, Mahir Bruno Petkoviçi əsas heyətdən çıxaracaq, amma istənilən halda o, Xorvatiya liqasına yarayan oyunçudur. Vacib deyil ki, Mahir yalnız hücumun ucunda çıxış etsin. Emreli universal futbolçudur, sağ və sol cinahda oynamağı bacarır. İnanırıq ki, onu hələ meydanda yenə görəcəyik".