Bosniya və Herseqovinanın “Jelezniçar” komandasının daha bir futbolçusu Bakıda “Neftçi”yə qarşı keçirəcəkləri UEFA Avropa Konfrans Liqasının II təsnifat mərhələsinin cavab oyununu buraxacaq.

Prosport.Az xəbər verir ki, yarımmüdafiəçi Semir Ştiliç 8-ci km qəsəbə stadionundakı qarşılaşmada iştirak edə bilməyəcək.

35 yaşlı oyunçu zədə səbəbindən ilk görüşdə olduğu kimi, cavab matçında da məşqçilər korpusunun sərəncamında olmayacaq. Daha əvvəl müdafiəçi Amar Drinanın cəzalı olduğu üçün 2-ci oyunu buraxacağı açıqlanmışdı.

Əvəzində yarımmüdafiəçi Edin Rustemoviç sıraya dönüb. Digər zədəlilər – İrfan Yaşareviç və Cozef Amoanın iştirakı isə sual altındadır.

Qeyd edək ki, avqustun 3-də oynanılacaq qarşılaşma saat 21:00-da başlayacaq. Sarayevodakı ilk matçda 2:2 hesabı qeydə alınıb.